آج چاند نظر نہیں آیا، 14مئی بروز جمعہ کو نماز دوگانہ ادا کی جائے گی

نئی دہلی:
آج ابھی بعد نماز مغرب رویت ہلال کمیٹی امارت شرعیہ ہند کی میٹنگ زیر صدارت مولانامفتی ذکاوت حسین قاسمی شیخ الحدیث مدرسہ امینیہ کشمیری گیٹ ، بمقام دفتر امارت شرعیہ ہند ،۱۔بہادر شاہ ظفرمارگ نئی دہلی منعقد ہوئی۔
چاند دیکھنے کا اہتمام کیا گیا، دہلی میںغبار آلود تھا ، چاندنظر نہیں آیا۔ ملک کے متعدد مقامات سے رابطہ کیا گیا، بعض مقامات پر مطلع صاف نہیں ہے، جبکہ بیشتر مقامات پر مطلع صاف ہے لیکن کہیں سے رویت کی معتبر اطلاع موصول نہیں ہوئی ۔
اس کے پیش نظر کمیٹی نے 30 کی رویت کا اعتبار کر کے اعلان کیا کہ رمضان المبارک کا 30 روزہ مکمل کیا جائے گا اور 14مئی 2021 بروز جمعہ، ماہ شوال المکرم1442ھ کی پہلی تاریخ ہوگی ۔
دریں اثناء مرکزی رویت ہلال کمیٹی جامع مسجد دہلی کے اجلاس نے عدم رویت کا فیصلہ ہے۔ لہٰذا میں اعلان کرتا ہوں کہ عیدالفطر ان شاء اللہ 14 مئی 2021 بروز جمعہ کو ہوگی۔
وہیں آج بروز بدھ بعد نماز مغرب دارالعلوم دیوبند میں رویت ہلال کمیٹی کی میٹنگ ہوئی، دیوبند واطراف میںمطلع ابرآلود ہونے کی وجہ سے چاند نظر نہیں آیا۔ ملک کے بہت سے مقامات سے اطلاع ملی کہ مطلع صاف ہونے کے باوجود چاند نہیں آیا ۔ لہٰذا رویت ہلال کمیٹی دارالعلوم دیوبند اعلان کرتی ہے کہ کل 13 مئی 2021 بروز جمعرات 30 رمضان المبارک ہوگی اور عیدالفطر 14 مئی 2021 جمعہ کو ہوگی۔
دوسری جانب شاہی امام مسجد فتحپوری دہلی مفکر ملت مولانا ڈاکٹر مفتی محمد مکرم احمد صدر مسجد فتحپوری رویت ہلال کمیٹی نے اعلان کیا کہ آج 29 رمضان المبارک کوعیدالفطر کا چاند نظر نہیں آیاہے، لہٰذا عیدالفطر بروز جمعہ14مئی2021 کو ہوگی۔ انہوں نے اپیل کی ہے کہ مسلمان کورونا لاک ڈاؤن کی وجہ سے گھروں میں ہی عید کی نماز کے وقت 4 رکعت نماز نفل ادا کریں ۔