کابل:
افغانستان کے بڑے ٹی وی چینلز میں شمار ہونے والے طلوع نیوز کی اسکرین پر خواتین اینکرز دوبارہ نمودار ہوئی ہیں۔
جب سے طالبان نے اتوار کو کابل پر قبضہ کیا، زیادہ تر چینلز نے خواتین اینکرز کو ٹی وی اسکرینوں سے ہٹا دیا تھا۔
سوشل میڈیا پر شیئر ہونے والی تصاویر میں دیکھا جا سکتا تھا کہ سرکاری چینل پر بھی خبریں ایک باریش مرد پڑھ رہا تھا۔
تاہم منگل کو طلوع نیوز کے ایک سینئر عہدیدار کی جانب سے کی جانے والی ٹوئٹس میں ایک خاتون اینکر کو طالبان کی میڈیا ٹیم کے نمائندے سے گفتگو کرتے دیکھا جا سکتا ہے۔
بی بی سی کے خدائے نور ناصر کے مطابق طالبان کے ریڈیو اسٹیشن ’شریعت ژغ‘ یا شریعت کی آواز کے ایک اہلکار کا انٹرویو کرنے والی طلوع کی خاتون صحافی بهشتی آرغند ہیں۔ یہ انٹرویو طلوع پر منگل کی صبح پروگرام ’نیمہ روز‘ میں نشر ہوا۔
