مظفر نگر :(ایجنسی)
یوپی اسمبلی انتخابات کو لے کر سیاسی ہلچل بڑھ رہی ہے۔ دریں اثناء بھارتیہ کسان یونین کے رہنما نریش ٹکیت نے ایس پی -آر ایل ڈی کے امیدوار کو پھر سے حمایت کرنے کا اعلان کیا ہے۔ بتا دیں کہ اس سے پہلے ان کے بھائی اور بی کے یو کے قومی ترجمان راکیش ٹکیت نے کسی بھی پارٹی کی حمایت کرنے پر اعتراض کیا تھا، جس کے بعد نریش ٹکیت نے یو ٹرن لیتے ہوئے کہا کہ ہم انتخابات میں کسی کی حمایت نہیں کر رہے ہیں۔
حالانکہ نریش ٹکیت نے دوسری بار ایس پی-آر ایل ڈی امیدوار کی حمایت کرنے کی بات کہی ہے۔ بتا دیں کہ پیر کو مرکزی وزیر سنجیو بالیان سیسولی میں نریش ٹکیت کے آبائی گھر پہنچے تھے۔ ان سے ملاقات کے بعد کئی سیاسی معنی نکالے جانے لگے۔ لیکن اس کے بعد نریش ٹکیت نے ایک بار پھر ایس پی -آر ایل ڈی کے حمایت یافتہ امیدوار کی حمایت کرنے کی بات کہی۔ آپ کو بتاتے چلیں کہ ان کا یہ بیان ایس پی سربراہ اکھلیش یادو کے ’ان سنکلپ‘ لیے جانے کے بعد آیا ہے۔
ذرائع کے مطابق نریش ٹکیت نے پیر کو اپنے بیان سے یو ٹرن لیا تھا کیونکہ ان کے چھوٹے بھائی اور بی کے یو کے ترجمان راکیش ٹکیت نے کسی سیاسی پارٹی یا اتحاد کی حمایت کرنے سے انکار کر دیا تھا۔ اہم بات یہ ہے کہ سنیکت کسان مورچہ نے اتوار کو ان تنظیموں سے تعلقات منقطع کر لیے تھے جو پنجاب میں انتخابی میدان میں اتری تھیں۔
بتادیں کہ پیر کو ایس پی سربراہ اکھلیش یادو نے ’’ان سنکلپ‘‘ لیا اور لکھیم پور کھیری کے کسانوں کے ساتھ کھڑے ہونے اور اتر پردیش کے آئندہ انتخابات میں بی جے پی کو ہرانے کا عزم کیا۔ اس کے بعد نریش ٹکیت کا ایس پی-آر ایل ڈی امیدوار کی حمایت کا تبصرہ آیا۔
بتاتے چلیں کہ گزشتہ سال 3 اکتوبر کو لکھیم پور کھیری واقعے میں زخمی ہونے والے سنیکت کسان مورچہ کے لیڈر تیجیندر سنگھ ورک اور لکھیم پور کھیری کے دیگر کسانوں کے ساتھ اکھلیش یادو نے اپنے ہاتھوں میں مٹھی بھر چاول اور گیہوں لےکر کہا :’ سماجوادی پارٹی نے فیصلہ کیا کہ ہم یہ ان سنکلپ لے کرکسانوں پر مظالم کرنےوالی بی جے پی کوہٹائیں گے اوراسےہرائیں گے ۔
بتا دیں کہ اکھلیش یادو نے 17 جنوری کو پریس کانفرنس میں کسانوں سے متعلق کئی وعدے بھی کیے تھے۔ انہوں نے ریاست میں ایس پی کی حکومت بننے پر گنے کے کسانوں کو 15 دنوں میں ادائیگی کرنے کی بات کہی۔ اکھلیش یادو نے کہا کہ کسان ریوالونگ فنڈ دیا جائے گا۔ اس کے علاوہ کسانوں کو بجلی مفت ملے گی۔
انہوں نے کسانوں کو بلاسود قرض اور بیمہ بھی دینے کا اعلان کیا ہے۔ ایس پی سربراہ نے کہا کہ بی جے پی کا منشور جاری ہونے کے بعد ہی وہ اپنا منشور لانچ کریں گے۔ اکھلیش نے کہا کہ بی جے پی پہلے بتائے کہ اس نے کتنے اسمارٹ شہر بنائے ہیں۔
