نئی دہلی : (ایجنسی)
ہریانہ کے کرنال میں کسانوں پر لاٹھی چارج کے بعد بھارتیہ کسان یونین کے قومی ترجمان راکیش ٹکیت بی جے پی حکومت پر مزید حملہ آور ہوگئے ہیں۔ ٹکیت نے ایک میٹنگ کے دوران کہا کہ حکومت نے لاٹھی چلوا کر ٹھیک نہیں کیا اور اسے فراموش نہیں کیا جائے گا۔ انہوں نے کہا کہ ہم نے تو پوری زندگی لڑائی لڑی ہے ۔ آپ نے تو نہ انگریزوں کے خلاف لڑائی لڑی اور نہ ہی مغلوں کے خلاف۔ اس کے بعد انہوں نے آر ایس ایس کو نشانہ پر لیا۔
ٹکیت نے کہاکہ آپ بچ کر نہیں جاؤ گے۔ آپ تو مہاتما گاندھی کے قاتل کا پوجا کرتے ہیں۔ ان کا کیا رشتہ ہے اس سے ؟ یہ آر ایس ایس کے لوگ گوڈسے کا مندر بنوانا چاہتے ہیں، جو مہاتما گاندھی کے قاتل کو پوجتے ہوں ، یہ کس طرح کا راشٹرواد ہے؟ وہیں راکیش ٹکیت نے میگھالہ کے گورنر ستیہ پال ملک کی تعریف بھی کی۔ انہوں نے کہاکہ بننا ہے تو ستیہ پال ملک جیسا بنو، جو گورنر ہوتے ہوئے کہہ پاتے ہیں کہ کھٹر نے کسانوں پر لاٹھیاں چلوا کر غلط کیا۔
بتادیں کہ کرنال کے واقعہ کے بعد ستیہ پال ملک نے ہریانہ حکومت پر سخت حملہ کرتے ہوئے کہاتھا کہ لاٹھی چارج کاحکم دینے والے افسر کو فوراً برطرف کیاجانا چاہئے۔ انہوںنے 600 کسانوں کی موت کی بات پر مرکزی سرکار کی بھی تنقید کی تھی۔ انہوں نے کہا تھاکہ مرکز کی طرف سے طاقت کے استعمال کرنے کا حکم نہیں ہوا تھا، لیکن سی ایم کسانوں کو پٹوا رہے ہیں ۔
قابل ذکر بات یہ ہے کہ آئی اے ایس افسر آیوش سنہا ، جنہوں نے مبینہ طور پر کسانوں کے سر پھوڑنے کا حکم دیا تھا ، کا تبادلہ کر دیا گیا ہے۔ سی ایم کھٹر نے ایس ڈی ایم کے الفاظ کو غلط بھی بتایا تھا۔
آیوش سنہا کے معاملے میں راکیش ٹکیت نے کہا کہ وہ آر ایس ایس کا آدمی ہے اور آئی اے ایس بن چکا ہے۔ ‘’سرکاری طالبانی‘ ملک میں گھس چکے ہیں۔ انہوں نے کہااگر آپ ہم کو خالصتانی کہیں گے تو ہم آپ کو سرکاری طالبان کہیں گے ۔ آپ کا طالبانی کمانڈر کرنال میں ہے اور کسان اس کو معاف نہیں کریں گے ۔ انہوں نے یہ بھی الزام لگایا کہ سرکار چاہتی تھی کہ اس آندولن میں قتل عام ہو۔
