غازی آباد (ایجنسی)
اتر پردیش اسمبلی انتخاب کو لے کر سبھی سیاسی پارٹیاں انتخابی تشہیر میں لگی ہوئی ہیں۔ کانگریس پارتی کی جنرل سکریٹری پرینکا گاندھی جمعہ کو غازی آباد میں گھر گھر جا کر تشہیر کر رہی ہیں۔ اسی درمیان انھوں نے اپنے مخالفین پر حملہ بولتے ہوئے کہا ہے کہ یہ انتخاب گرمی یا چربی نکالنے کی نہیں بلکہ بھرتی نکالنے پر ہونا چاہیے۔
پرینکا گاندھی نے جمعہ کو غازی آباد کے وجے نگر اور صاحب آباد علاقہ میں عوامی رابطہ کی مہم چلائی۔ انھوں نے لوگوں کے گھر گھر اور دکانوں میں جا کر کانگریس کو ووٹ دینے کی اپیل بھی کی۔ کانگریس پارٹی کے تمام کارکنان انتخابی مہم کے دوران ’لڑکی ہوں، لڑ سکتی ہوں‘ اور ’مہر لگے گی ہاتھ پر‘ نعرہ لگاتے ہوئے دکھائی پڑے۔
دراصل صاحب آباد سے کانگریس کے ترجمان راجیو تیاگی کی بیوی سنگیتا تیاگی کو کانگریس پارٹی نے امیدوار بنایا ہے۔ صاحب آباد میں عوامی رابطہ کے دوران پرینکا گاندھی نے ایک بچے سے ملاقات کی جس کی حاملہ ماں کی کورونا بحران میں موت ہو گئی تھی۔ پرینکا نے بچے اور اس کے کنبہ کی تکلیف سنی اور ہر ممکن مدد کا بھروسہ دیا۔
وزیر اعلیٰ یوگی کے گرمی ختم کرنے والے بیان پر جہاں آر ایل ڈی چیف جینت چودھری نے چربی اتارنے والا بیان دیا تھا، وہیں اب پرینکا گاندھی نے ان دونوں بیانوں پر حملہ کرتے ہوئے کہا کہ فضول کی باتیں نہ کریں اور ترقی کی بات کریں۔ عوام پریشان کیوں ہے؟ مہنگائی، بے روزگاری اتنی کیوں ہے؟ تعلیم کی سہولیات نہیں ہیں، سب پر کورونا کی مار پڑی ہے۔ اس انتخاب میں گرمی یا چربی نکالنے کی بات نہیں ہونی چاہیے بلکہ بھرتی نکالنے کی بات ہونی چاہیے۔
انتخابی تشہیر کے دوران پرینکا گاندھی نے میڈیا سے بات کرتے ہوئے کہا کہ اتر پردیش میں ہم نے اپنی تنظیم کو مضبوط کرنے کے لیے بہت کام کیا ہے۔ کانگریس نوجوانوں اور خواتین کی آواز اٹھانے میں لگی ہوئی ہے۔ ہم نے نوجوانوں کے لیے منشور بھی جاری کیا ہے جس میں یہ بتایا گیا ہے کہ نوجوانوں کو روزگار کیسے دیا جائے گا۔
