یوپی :مفت میں آکسیجن مہیا کرانے والے وکی پر مقدمہ درج

لکھنؤ:
ملک میں کورونا سانحہ کے دوران بڑھتے آکسیجن بحران کے دوران کئی لوگوں کو مفت میں آکسیجن دے کر جان بچانے والےسماجی خدمتگار کے خلاف مقدمہ درج کرا کر انتظامیہ بیک فٹ پر آگئی ہے۔جونپور کی ضلع انتظامیہ نے اپنی فضیحت ہوتے دیکھ کر مریضوں کو مفت میں آکسیجن مہیا کرانے والے سماجی خدمتگار وکی اگہری کے خلاف وبائی ایکٹ سمیت کئی دفعات میں مقدمہ درج کرایا دیا۔ معاملہ میڈیا میں وائرل ہونے کے بعد محکمہ صحت اور ضلع انتظامیہ کے ہاتھ پاؤں پھول گئے، جس کے بعد انتظامیہ اب اس معاملے کی جانچ کرانے کی بات کررہی ہے۔
یوپی کے ضلع جون پور میں ضلع اسپتال کے باہر آکسیجن کی قلت سے تڑپتے مریضوں کے لیے وکی فرشتہ بن کر سامنے آئے۔ وکی اگہری نے اپنی طرف سے 29 اپریل کو ضلع اسپتال احاطہ میں آکسیجن کی قلت سے دوچار مریضوں کو آکسیجن سلنڈر دستیاب کرایا۔ صبح سے ضلع اسپتال کے باہر تقریباً 25 سے 30 مریضوں کو آکسیجن سلنڈر دستیاب کرا چکے ہیں۔ ان کا کہنا ہے کہ وہ پیسے تو بعد میں بھی کما لیں گے مگر اس کورونا کے بحران میں لوگوں کی مدد کرنا چاہتے ہیں۔
ٹوٹتی سانسوں کے لئے فرشتہ بن کر آنے والے وکی کی یہ مدد انتظامیہ کو ناگوار گزری اور ضلع اسپتال کے سی ایم ایس کی تحریر پر پولیس نے وکی کے خلاف وبائی ایکٹ 3 اور آئی پی سی کی دفعہ 188 اور 269 کے تحت مقدمہ درج کرلیا۔ اس بارے میں آکسیجن سپلائی کرنے والے وکی نے بتایا کہ ضلع اسپتال میں کئی مریض آکسیجن کی قلت سے تڑپ رہے تھے وہ لگاتار یہ سلسلہ اپنی آنکھوں کے سامنے دیکھ رہے تھے ۔
انہوں نے کئی مریضوں کو مفت میں آکسیجن دستیاب کرائی۔ ان کا کہنا ہے کہ معلوم نہیں کیوں ضلع اسپتال کے سی ایم ایس اور انتظامیہ کو یہ بات قابل اعتراض لگ گئی۔ انتظامیہ نے ان کے اوپر مقدمہ درج کرا دیا ۔ اس سلسلے میں پوچھے جانے پر ضلع افسر منیش کمار ورما نے بتایا کہ ایسا معاملہ نوٹس میں آیا ہے اور اس کی جانچ کرائی جارہی ہے۔ اس سلسلے میں جو بھی غلط پایا جائے گا اس کے خلاف کارروائی کی جائے گی۔