حکومت کا ارادہ شہروں کو کچرے کے پہاڑوں سے نجات دلانا ہے: مودی

نئی دہلی؍ اندور:(ایجنسی)

وزیر اعظم نریندر مودی نے آج مدھیہ پردیش کے اندور میں قائم ایشیا کے سب سے بڑے بائیو-سی این جی پلانٹ ’گوبر-دھن‘ کا افتتاح کرتے ہوئے کہا کہ گوبر-دھن کچرے سے کنچن بنانے کی مہم ہے اور حکومت اگلے دو تین سالوں میں شہروں کو کچرے کے پہاڑوں سے پاک کرنے کا ارادہ ہے۔

مسٹر مودی نے اس پلانٹ کا ورچوئل طریقے سے افتتاح کرتے ہوئے اندور کے لوگوں کی تعریف کی۔ انہوں نے کہا کہ کچرے کو ٹھکانے لگانا کسی بھی شہر کے مکینوں کی محنت کے بغیر ممکن نہیں ہے۔ انہوں نے کہا کہ جس جگہ پر یہ پلانٹ لگایا گیا ہے، چند سال قبل اس کی شناخت صرف کچرے کے پہاڑ کے طور پر کی تھی۔ اندور میونسپل کارپوریشن نے اس ڈمپنگ سائٹ کو گرین زون میں تبدیل کرنے کے لیے سخت محنت کی ہے۔

انہوں نے کہا کہ آئندہ دو سالوں میں ملک کے 75 بڑے شہری اداروں میں اس طرح کے پلانٹ لگانے کا کام کیا جائے گا۔ یہ کوششیں شہروں کو صاف ستھرا بنانے اور کلین انرجی فراہم کرانے میں مددگار ثابت ہوں گی۔ گاؤں میں بھی بڑی تعداد میں گوبر دھن بائیو گیس پلانٹ قائم کئے جا رہے ہیں۔ ایسے میں نہ صرف گائے کے گوبر سے اضافی آمدنی ہوگی بلکہ بے سہارا جانوروں کا مسئلہ بھی کم ہونے لگے گا۔

اس دوران اپنا وژن پیش کرتے ہوئے وزیراعظم نے کہا کہ گزشتہ سات سالوں میں حکومت کی کوشش ہے کہ ہر مسئلے کا مستقل حل کردیا جائے۔ سوچھ بھارت ابھیان اس کی ایک مثال ہے۔ اس مہم سے بیماریوں پر قابو پانے کے ساتھ شہروں کی خوبصورتی میں بھی اضافہ ہوا ہے۔

ہندوستان ڈرون کے میدان میں پوری دنیا کو نئی قیادت فراہم کرے گا: مودی

دریں اثناء وزیر اعظم نریندر مودی نے ہفتہ کے روز کہا کہ ملک میں اسٹارٹ اپ کا ایک نیا ایکوسسٹم تیار ہورہا ہے اور بہت جلد ان کی تعداد ہزاروں تک پہنچ جائے گی اور آنے والے وقت میں ہندوستان ڈرون کے شعبے میں دنیا نئی قیادت فراہم کرے گا۔

گروڑ ا ایرو اسپیس کے ذریعے 108 کسان ڈرون کی پرواز کے موقع پر اپنے خطاب میں، مسٹر مودی نے کہا کہ "ہندوستان میں ڈرون اسٹارٹ اپ کا ایک نیا ایکو سسٹم تیار ہو رہا ہے۔ اس وقت ملک میں 200 سے زیادہ ڈرون اسٹارٹ اپ کام کر رہے ہیں۔ بہت جلد ان کی تعداد ہزاروں تک پہنچ جائے گی۔ اس سے روزگار کے لاکھوں نئے مواقع بھی پیدا ہوں گے۔ مجھے یقین ہے کہ آنے والے وقت میں ہندوستان کی اس بڑھتی ہوئی صلاحیت سے ڈرون کے میدان میں پوری دنیا کو نئی قیادت فراہم ہوگی۔ ,

انہوں نے کہا کہ ملک میں جو اسٹارٹ اپ کی دنیا بنی ہے اس کا سہرا ان نوجوانوں کو جاتا ہے جو رسک لے کر یہ کام کررہے ہیں۔ نوجوانوں کو یقین دلاتے ہوئے انہوں نے کہا، ’حکومت ہند پالیسیوں کے ذریعہ لگاتار آپ کے ساتھ کندھے سے کندھا ملا کر آپ کی ترقی میں کوئی رکاوٹ نہیں آنے دے گی۔‘