نئی دہلی:(ایجنسی)
تیل اور گیس کمپنیاں عوام کی جیبوں پر مسلسل بوجھ بڑھا رہی ہیں۔ پٹرول اور ڈیزل کے بعد اب سی این جی کی قیمتیں بھی روزانہ بڑھنے لگی ہیں۔ دہلی سمیت کئی شہروں میں جمعرات کو مسلسل دوسرے دن کمپنیوں نے سی این جی کی قیمتوں میں اضافہ کیا۔ اندرا پرستھ گیس لمیٹڈ (آئی جی ایل)کے مطابق، 7 اپریل کو دہلی میں CNG کی قیمت میں 2.50 روپے فی کلو کا اضافہ کیا گیا ہے۔ اب دہلی میں سی این جی 69.11 روپے فی کلو کے حساب سے مل رہی ہے۔ اس سے پہلے بدھ کو بھی دہلی میں سی این جی 2.5 مہنگی ہوئی تھی۔ یعنی صرف دو روز میں سی این جی کی قیمت میں 5 روپے فی کلو اضافہ ہوا ہے۔ اس سے قبل 4 اپریل کو بھی دہلی میں سی این جی کی قیمتوں میں اضافہ کیا گیا تھا۔ ایک ہفتے سے بھی کم عرصے میں دہلی میں سی این جی کی قیمتوں میں 9.11 روپے فی کلو کا اضافہ ہوچکا ہے۔
دہلی ہی نہیں نوئیڈا، گریٹر نوئیڈا، غازی آباد اور گروگرام جیسے شہروں میں بھی آج سے سی این جی مہنگی ہو گئی ہے۔ یہاں بھی 2.50 روپے فی کلو کا اضافہ ہوا ہے۔ نوئیڈا، گریٹر نوئیڈا اور غازی آباد میں سی این جی کی قیمت بڑھ کر 71.67 روپے فی کلو ہو گئی ہے، جبکہ گروگرام میں یہ 77.44 روپے میں فروخت ہو رہی ہے۔ سب سے مہنگی سی این جی کانپور، ہمیر پور اور فتح پور میں 80.90 روپے فی کلو میں فروخت ہو رہی ہے۔
بدھ کو ممبئی میں سی این جی کی قیمت میں 7 روپے فی کلو اضافہ کیا گیا۔ مہانگر گیس لمیٹڈ نے قیمتوں میں 67 روپے کا اضافہ کر دیا ہے۔ تاہم، ممبئی میں اب بھی دہلی سے تقریباً 2 روپے فی کلو سستی سی این جی مل رہی ہے۔
عالمی منڈی میں بڑھتی ہوئی قیمتوں کی وصولی کے لیے کمپنیوں نے صرف ایک ماہ کے اندر سی این جی کی قیمتوں میں آٹھ مرتبہ اضافہ کیا ہے۔ اس دوران تقریباً 10 روپے کا اضافہ کیا گیا ہے۔ یہی نہیں، 2022 میں اب تک کمپنیوں نے قیمت میں تقریباً 14 روپے فی کلو کا اضافہ کیا ہے۔ جس کی وجہ سے پرائیویٹ گاڑیوں کے ڈرائیوروں کے ساتھ آٹو ٹیکسی ڈرائیوروں پر بوجھ بڑھتا جا رہا ہے۔
دہلی-ممبئی جیسے میٹرو سٹی میں، آٹو اور کیب جیسی خدمات عام آدمی کے لیے مہنگی ہو سکتی ہیں۔ ایک کیب ڈرائیور نے بتایا کہ گرمیوں میں مسافروں کے لیے اے سی زیادہ چلانا پڑتا ہے جس سے گیس کی قیمت بڑھ جاتی ہے۔ اب قیمت میں مسلسل اضافے کی وجہ سے کرایہ بھی بڑھانا پڑے گا۔ آٹو ڈرائیوروں نے بھی فی کلومیٹر زیادہ کرایہ وصول کرنے کی بات کہی ہے۔
