الٰہ آباد:(ایجنسی)
الٰہ آباد ہائی کورٹ نے لائوڈ اسپیکر سے اذان والی عرضی کو خارج کردیا ہے۔ الہ آباد ہائی کورٹ نے کہاکہ لائوڈ اسپیکر سے اذان بنیادی حق نہیں ہے، عرضی میں لائوڈ اسپیکر سے اذان کی درخواست کی گئی تھی۔
بتادیں کہ اترپردیش کے بدایوں کے رہنے والے عرفان نے الہ آباد ہائی کورٹ میں عرضی دائر کرکے درخواست کی تھی کہ نوری مسجد سے لائوڈ اسپیکر سے اذان کی اجازت دی جائے۔ اب اس عرضی کو الہ آباد ہائی کورٹ نے خارج کردی ہے۔ الہ آباد ہائی کورٹ نے اس معاملے پر تبصرہ کرتے ہوئے کہاکہ اذان اسلام کا لازمی حصہ ہے لیکن لائوڈ اسپیکر سے اذان دینا اسلام کا حصہ نہیں ہے۔
جسٹس بی کے وڈلا اور جسٹس وکاس کی ڈویژن بینچ نے عرضی خارج کردی۔غورطلب ہے کہ یوپی، مہاراشٹر سمیت ان دنوںملک کی کئی ریاستوں میں لائوڈ اسپیکر کو لے کر تنازعہ جاری ہے، یوپی میں یوگی سرکار نے بڑے پیمانے پر مندروں اور مسجدوں سے لائوڈ اسپیکر اتروائے دئے ہیں، اس کے علاوہ کئی مذہبی مقامات سے لائوڈ اسپیکر کی آواز کم کرنے کو کہا ہے۔ وہیں مہاراشٹر میں مسجد کے ٹرسٹیان نے یہ فیصلہ کیا ہے کہ سپریم کورٹ کے فیصلے پر عملدرآمد کرتے ہوئے فجر کی اذان بنا لائوڈ اسپیکر کے دی جائے گی۔
