احمد آباد:(ایجنسی)
کانگریس پارٹی سے استعفیٰ دینے کے بعد ہاردک پٹیل 2 جون کو بی جے پی میں شامل ہونے جا رہے ہیں۔ بی جے پی میں شامل ہونے سے پہلے ہاردک پٹیل نے سوشل میڈیا کے ذریعے لکھا کہ وہ چھوٹے سپاہی بن کر بی جے پی کے ساتھ کام کریں گے ۔ بی جے پی میں شامل ہونے سے پہلے ہاردک پٹیل کے کئی پرانے بیانات سوشل میڈیا پر وائرل ہو رہے ہیں۔ جس پر سوشل میڈیا صارفین طنز کر رہے ہیں۔
ہاردک پٹیل کا بیان: بی جے پی میں شامل ہونے سے پہلے ہاردک پٹیل نے لکھا کہ قومی مفاد، ریاستی مفاد، عوامی مفاد اور سماجی مفاد کے جذبات کے ساتھ، میں آج سے ایک نئے باب کا آغاز کرنے جا رہا ہوں۔ میں ہندوستان کے کامیاب وزیر اعظم نریندر بھائی مودی کی قیادت میں قومی خدمت کے بھاگیرتھ کام میں ایک چھوٹے سپاہی کے طور پر کام کروں گا۔
یہ ٹویٹس وائرل: ہاردک پٹیل کا ٹویٹ سوشل میڈیا پر سب سے زیادہ وائرل ہو رہا ہے۔ جس میں انہوں نے کہا تھا کہ اگر صبح کا دیش دروہی شام کو بی جے پی میں شامل ہوجائے تو اسے دیش بھکت کہا جاتا ہے۔ ساتھ ہی انہوں نے ایک اور ٹوئٹ میں یہ بھی کہا تھا کہ عوام کے منتخب کردہ نمائندے اپنی خود غرضی کے لیے عوام کو دھوکہ دے کر پارٹی بدلتے ہیں تو ایسے خود غرض لیڈروں کو چوراہے پر کھڑے ہو کر چپلوں سے پیٹنا چاہیے۔
2017 میں ایک ٹویٹ کے ذریعے ہاردک پٹیل نے مرکزی وزیر امت شاہ کو نشانہ بناتے ہوئے لکھا تھا کہ بی جے پی میں صحیح لوگوں کی عزت نہیں کی جاتی، لیکن جو لوگ امت شاہ کےپیروں کی جوتی بن کر رہتا ہے ، ان کو آگے کیا جا تا ہے ۔ ہاردک پٹیل کے پرانے ٹویٹ کو شیئر کرتے ہوئے راجیش ساہو نامی ٹوئٹر صارف نے لکھا کہ ہاردک بھائی کو بہت بہت مبارک ہو، جو جوتا بن کر آگے بڑھنے کے لیے تیار ہیں۔
یہ ویڈیو بھی وائرل: اسی دوران ہاردک پٹیل کا ایک پرانا ویڈیو بھی سوشل میڈیا پر تیزی سے وائرل ہو رہا ہے۔ جس میں وہ ایک نیوز چینل سے بات کر رہے ہیں۔ اس دوران جب ان سے وزیر اعظم نریندر مودی کے بارے میں سوال کیا جاتا ہے تو وہ انہیں ’پھینکو‘ کہتے ہیں۔ دوسری طرف جب مرکزی وزیر داخلہ سے اس موضوع پر پوچھا گیا تو ان کا کہنا تھا کہ وہ ایک ’غنڈے‘ہیں۔ جانکاری کے لیے بتاتے چلیں کہ ہاردک پٹیل آج رات 11 بجے بھارتیہ جنتا پارٹی کا ہاتھ تھام لیں گے۔
