پٹنہ:(ایجنسی)
راشٹریہ جنتا دل کے سربراہ لالو یادو نے اتوار کو حکمراں بھارتیہ جنتا پارٹی کے خلاف سخت حملہ کرتے ہوئے کہا کہ ملک ’خانہ جنگی کی طرف بڑھ رہا ہے‘۔ بہار کے سابق وزیر اعلیٰ نے عوام سے مہنگائی اور بے روزگاری کے خلاف متحد ہونے کی بھی اپیل کی۔ لالو یادو نے کہا، ’جس طرح سے بی جے پی کام کر رہی ہے، ملک خانہ جنگی کی طرف بڑھ رہا ہے۔ میں لوگوں سے ملک میں مہنگائی، بے روزگاری اور بدعنوانی کے خلاف متحد ہونے کی اپیل کرتا ہوں۔ ہمیں متحد ہو کر لڑنا ہے اور ہم جیتیں گے۔‘یہی نہیں لالو یادو نے سیکولر طاقتوں سے متحد ہو کر لڑنے کی اپیل بھی کی۔ انہوں نے کہا کہ ہمیں پیچھے ہٹنے کی ضرورت نہیں ہے۔ لالو یادو نے یہ بیان یوم انقلاب کے دوران اپنے خطاب میں دیا۔
بتا دیں کہ لالو یادو کو چارہ گھوٹالہ سے متعلق ایک معاملے میں اپریل میں جھارکھنڈ ہائی کورٹ نے ضمانت دی تھی۔ راشٹریہ جنتا دل (آر جے ڈی) کے صدر لالو پرساد یادو چند ہفتے قبل ہی اپنی آبائی ریاست بہار واپس آئے تھے۔ وہ اپنی بڑی بیٹی میسا بھارتی کے ساتھ پٹنہ پہنچے۔ لالو پرساد یادو چارہ گھوٹالہ کیس میں گزشتہ ماہ جھارکھنڈ ہائی کورٹ سے ضمانت پر رہا ہونے کے بعد میسا کی دہلی رہائش گاہ پر مقیم تھے۔
31 مئی کو پٹنہ آنے کے بعد لالو نے پارٹی لیڈروں کے ساتھ میٹنگ بھی کی تھی۔ اس ملاقات کے بعد لالو یادو کے بیٹے تیجسوی یادو نے ٹویٹ کیا تھا اور لکھا تھا کہ آج لیجسلیچر پارٹی کی میٹنگ معزز قومی صدر اور سینئر لیڈروں کی موجودگی میں ختم ہوئی۔ میٹنگ میں ایک کروڑ لوگوں کو آر جے ڈی کا ممبر بنانا، ذات پات پر مبنی مردم شماری، مہنگائی اور بے روزگاری کو ایجنڈے میں شامل کیا گیا۔ ان مسائل پر تحریک کو تیز کرنے کے حوالے سے بھی بات چیت ہوئی۔
