پی ایف آئی نے کہا ،کانپور تشدد سے کوئی لنک نہیں،ہمیں سافٹ ٹارگٹ بنایا جارہا ہے

لکھنؤ:(ایجنسی)

اترپردیش کے کانپور میںہوئے تشدد کو لےکر پاپولر فرنٹ آف انڈیا ( پی ایف آئی) کے جنرل سکریٹری انیس احمد سامنے آئے ہیں ۔ انہوں نے کہا ہے کہ کانپور تشدد سے پی ایف آئی کا کوئی لینا دینا نہیں ہے۔ ہم کانپور تشدد کی مذمت کرتے ہیں۔ ہم بی جے پی اور مرکزی ایجنسیوں کے لیے سافٹ ٹارگٹ بن گئے ہیں، اس لیے PFI کا نام کسی نہ کسی حملے کے ساتھ جوڑا جاتا ہے۔

آج تک کے ساتھ خصوصی بات چیت میں، پی ایف آئی چیف انیس احمد نے کہا، کانپور کو چھوڑیں، پورے اتر پردیش میں پی ایف آئی کی کوئی یونٹ نہیں ہے۔ پی ایف آئی کی صرف یوپی میں ایڈہاک یونٹ ہے۔ کانپور تشدد کی ایف آئی آر میں بھی ہمارا نام نہیں ہے۔ ساتھ ہی ہمارا تشدد کے ملزمان سے کوئی تعلق نہیں ہے۔

بی جے پی پر الزام لگاتے ہوئے انیس احمد نے مزید کہا کہ مرکزی اور بی جے پی کے زیر اقتدار ریاستوں کی حکومتیں ہمیں سافٹ ٹارگٹ بناتی ہیں۔ جب راجستھان کے کرولی میں فسادات ہوئے تو پی ایف آئی کا نام جوڑنے کی کوشش کی گئی لیکن وہاں کے ایس پی نے خود کہا کہ تشدد میں پی ایف آئی کا کوئی کردار نہیں ہے۔

انہوں نے کہا کہ پی ایف آئی کا تعلق مدھیہ پردیش کے کھرگون میں ہونے والے تشدد سے جوڑنے کی بھی کوشش کی گئی تھی، لیکن اب تک اس کا کوئی تعلق سامنے نہیں آیا ہے۔ ساتھ ہی، یوپی میں بھی سی اے اے ؍این آر سی کے دوران ہونے والے مظاہروں میں پی ایف آئی کےلنک بتانے کی کوشش کی گئی، لیکن اب تک کچھ ثابت نہیں ہوا۔

کانپور میں تشدد اور پتھراؤ کے واقعے کے بعد اب تک 500 لوگوں کے خلاف مقدمات درج کیے گئے ہیں اور اب تک 24 لوگوں کو گرفتار کیا گیا ہے۔ گرفتار ہونے والوں میں مولانا محمد علی جوہر فینز ایسوسی ایشن کے سربراہ حیات ظفر ہاشمی بھی شامل ہیں جن کے بارے میں کہا جاتا ہے کہ وہ اس واقعے کے ماسٹر مائنڈ ہیں۔ ہاشمی سمیت 36 افراد کے نام ہیں جن پر نماز جمعہ کے بعد تشدد کرنے کا الزام ہے۔ اس تشدد میں پی ایف آئی (پاپولر فرنٹ آف انڈیا) جیسی تنظیموں کے ملوث ہونے کی بھی جانچ کی جا رہی ہے۔

قابل ذکر بات یہ ہے کہ بی جے پی کی ترجمان نوپور شرما نے حال ہی میں ایک ٹی وی نیوز چینل پر ڈبیٹ کے دوران پیغمبر اسلام محمدؐ کے خلاف قابل اعتراض تبصرہ کیا تھا۔ جس کے خلاف احتجاج میں نماز جمعہ کے بعد کانپور شہر میں جب مسلم کمیونٹی کے لوگوں نے دکانیں بند کرانے کی کوشش کی تو بیکن گنج، پریڈ، نئی سڑک اور یتیم خانہ علاقوں میں جھڑپیں شروع ہوگئیں۔ ان جھڑپوں میں پولیس اہلکاروں سمیت 40 افراد زخمی ہوگئے۔