نئی دہلی: (ایجنسی)
مغربی بنگال کی وزیر اعلیٰ اور ٹی ایم سی کی سربراہ ممتا بنرجی نے نوپور شرما کی گرفتاری کا مطالبہ اٹھایا ہے۔ انہوں نے کہا ہے کہ ایسے متنازع بیانات دینے والوں کے خلاف فوری کارروائی کی جائے۔
دہلی پولیس کے پی آر او سمن نلوا نے کہا کہ سوشل میڈیا پر دوسرے مذاہب پر قابل اعتراض تبصرہ کرنے والوں کے خلاف ایف آئی آر درج کی گئی ہے۔ انہوں نے بتایا کہ اس معاملے میں 2 ایف آئی آر درج کی گئی ہیں جس میں نوپور شرما، نوین کمار جندل، اسد الدین اویسی اور کئی دیگر کے خلاف مقدمہ درج کیا گیا ہے۔
دہلی پولیس نے اویسی کے خلاف بھی ایف آئی آر درج کی
دہلی پولیس کے خصوصی سیل نے اشتعال انگیز بیان بازی کے سلسلہ میں نوپور شرما اور دیگر افراد کے خلاف ایف آئی آر درج کی ہے۔ اے این آئی کے مطابق اس ایف آئی آر میں مجلس اتحاد المسلمین کے سربراہ اسد الدین اویسی کو بھی نامزد کیا گیا ہے۔ اس کے علاوہ نتی ایف آئی آر میں نرسنگھا نند کا نام نام بھی شمال ہے۔
اسدالدین اویسی کی اے آئی ایم آئی ایم کے کارکنوں نے جمعرات کو دہلی میں نوپور شرما کے پیغمبر اسلام کے خلاف متنازع تبصرے پر مظاہرہ کیا۔ انہوں نے جنتر منتر کے قریب احتجاج کیا اور اس دوران ان میں سے کچھ کارکنوں کی پولیس اہلکاروں سے جھڑپ ہوگئی۔ حالات پر قابو پانے کے لیے پولیس کو انہیں حراست میں لینا پڑا۔
دلچسپ بات یہ ہے کہ اے آئی ایم آئی ایم نے یہ مظاہرہ جمعرات کی دوپہر کو خبر آنے کے بعد کیا کہ اویسی کے خلاف اشتعال انگیز تقریر کرنے کا مقدمہ درج کیا گیا ہے۔
اسی دوران پیغمبر اسلام کے خلاف متنازعہ تبصرہ کرنے پر بی جے پی سے نکالے گئے نوین کمار جندل نے کہا ہے کہ انہیں مسلسل دھمکیاں مل رہی ہیں۔ اس دوران ان پر ذہنی دباؤ بھی رہتا ہے۔ گھر والوں پر بھی دباؤ ہے۔ انہوں نے یہ باتیں جمعرات (9 جون 2022) کو ایک ہندی چینل سے بات چیت کے دوران کہیں۔
پارٹی کی کارروائی پر سوال پوچھے جانے پر انہوں نے کہا- اس معاملے پر میرا کوئی تبصرہ نہیں ہے۔ میں اس پر بحث نہیں کرنا چاہتا۔ نریندر مودی اور امت شاہ نے ملک کے لیے جو کچھ کیا ہے اس زمین پر کسی بھی سیاستدان نے نہیں کیا۔ ملکی دفاع کے لیے کوئی قربانی دی جائے تو اس کی پرواہ نہیں کرنی چاہیے۔
اس سے قبل، دہلی پولیس نے بدھ کو کہا کہ اس نے کچھ لوگوں کے خلاف مقدمہ درج کیا ہے جو مبینہ طور پر نفرت انگیز پیغامات پھیلا رہے ہیں، مختلف گروپوں کو اکسا رہے ہیں اور ایسی صورتحال پیدا کر رہے ہیں جس سے امن و امان کو نقصان پہنچ سکتا ہے۔
پولیس نے بتایا کہ نوین کمار جندل، شاداب چوہان، صبا نقوی، مولانا مفتی ندیم، عبدالرحمن اور گلزار انصاری کو اسپیشل سیل کے انٹیلی جنس فیوژن اینڈ اسٹریٹجک آپریشن (IFSO) یونٹ کی طرف سے درج ایف آئی آر میں نامزد کیا گیا ہے۔ آئی ایف ایس سی کے ڈپٹی کمشنر پولیس کے پی ایس ملہوترا نے کہا کہ ایف آئی آر مختلف مذاہب کے لوگوں کے خلاف درج کی گئی ہے۔
