نئی دہلی :(ایجنسی)
حکومت نے جموں و کشمیر میں کالعدم جماعت اسلامی سے وابستہ فلاح عام (FAT) کے زیر انتظام تمام اسکولوں کو بند کرنے کا حکم دیا ہے۔ ان اسکولوں کو آئندہ 15 دنوں میں سیل کر دیا جائے گا۔
ہندی اخبار امر اجالا کی خبر کے مطابق ان اسکولوں میں پڑھنے والے طلباء کو قریبی دوسرے اسکولوں میں داخل کرایا جائے گا۔ ریاستی تحقیقاتی ایجنسی یعنی ایس آئی اے کی تحقیقات کے بعد محکمہ اسکول ایجوکیشن کے پرنسپل سکریٹری بی کے سنگھ کی طرف سے جاری کردہ حکم میں کہا گیا ہے کہ ان اسکولوں کو ضلع انتظامیہ کی مشاورت سے سیل کیا جائے گا۔
ایس آئی اے کی تحقیقات میں، ایف اے ٹی پر غیر قانونی سرگرمیوں، دھوکہ دہی اور سرکاری زمین پر بڑے پیمانے پر قبضے کے الزامات عائد کیے گئے تھے۔ ایف اے ٹی کا تعلق جماعت اسلامی سے ہے جس پر وزارت داخلہ نے غیر قانونی سرگرمیوں کی روک تھام کے ایکٹ کے تحت پابندی عائد کر رکھی ہے۔
اخبار نے حکام کے حوالے سے لکھا ہے کہ ایف اے ٹی کے 300 سے زائد اسکول غیر قانونی طور پر حاصل کی گئی سرکاری اور کمیونٹی اراضی پر پائے گئے۔
حکام نے بتایا کہ زیادہ تر FATاپنا کام اسکولوں، مدرسوں، یتیم خانوں، مساجد اور دیگر خیراتی کاموں سے چلاتے ہیں۔ ایسے اداروں نے 2008، 2010 اور 2016 میں بڑے پیمانے پر بدامنی پھیلانے میں تباہ کن کردار ادا کیا جس سے عام لوگوں کو شدید مشکلات کا سامنا کرنا پڑا۔
