احمد آباد :(ایجنسی)
اگنی پتھ اسکیم کے خلاف پورے ملک میں ہنگامہ ہے۔ حکومت کو کروڑوں کی املاک کے نقصان کا سامنا ہے، پھر بھی لوگ پرسکون نہیں ہو رہے ہیں۔ ایسے میں بابا رام دیو نے احتجاج کررہےلوگوں کو ملک دشمن (دیش دروہی)تک قرار دے دیا ہے۔ مودی حکومت کی اسکیم کی حمایت کرتے ہوئے رام دیو نے کہا کہ ایسے لوگ گاندھی جی کے عدم تشدد کے ملک کے شہری نہیں ہیں۔ وہ ملک دشمن ہیں کیونکہ وہ ہماری قومی املاک کو نقصان پہنچا رہے ہیں۔
گجرات پہنچے رام دیو نے کہا کہ حکومت نے سوچ سمجھ کر اگنی ویر کو تیار کرنے کی اسکیم تیار کی ہے۔ اس سے فوج اور ملک دونوں کو فائدہ ہوگا۔ انہوں نے کہا کہ اسکیم کی مخالفت کیوں ہو رہی ہے یہ بات وہ نہیں سمجھ پارہے ہیں ۔ انہوں نے کہا کہ تشدد اور مظاہرے فوری طور پر روکے جائیں۔ خیال رہے کہ رام دیو اکثر مودی حکومت کے حق میں کھڑے نظر آتے ہیں۔ وہ ایسے ماحول میں بھی بی جے پی کی حمایت کر رہے ہیں جب پورے ملک میں ابال ہے۔ نوجوان سڑکوں پر آکر احتجاج ومظاہرے کر رہے ہیں۔ ہر طرف آتش زنی کے واقعات دیکھنے کو مل رہے ہیں۔
پاٹیدار سماج کے ایک پروگرام میں پہنچے رام دیو نے کہا کہ اگر نریندر مودی آج ملک کے پی ایم ہیں تو اس کی وجہ یہ نہیں ہے کہ وہ ایک امیر گھرانے سے تھے۔ انہوں نے جدوجہد کے ذریعے یہ مقام حاصل کیا۔ ایک وقت میں دہلی کی (منموہن سنگھ) حکومت نے انہیں لٹکانےکی کوشش بھی کی تھی۔ لیکن حکومت کو ان کی ہمت کے آگے جھکنا پڑا۔ وہ ان کو ختم کرنا چاہتی تھی۔
رام دیو نے وہ لمحہ بھی یاد کیا جب دہلی کی منموہن سنگھ حکومت نے امت شاہ کو گجرات میں داخل ہونے سے روک دیا تھا۔ پھر ان کی ملاقات رام جیٹھ ملانی سے ہوئی۔ اس دوران وہ بھی تکلیف میں تھے اور ہم بھی۔ پاٹیداروں کو بہادر بتاتے ہوئے انہوں نے کہا کہ انہیں متحد رہنا چاہئے۔ یہ بہت اہم ہے۔
نوپور شرما کیس پر بابا نے کہا کہ بی جے پی کے سابق ترجمان کو اس طرح نہیں بولنا چاہئے تھا۔ کسی کے نبی کی توہین کرنا غلط ہے۔ لیکن انہوں نے یہ بھی کہا کہ اگر ہمارے آباؤ اجداد کو اتنا بتایا جاتا تو کچھ نہ ہوتا۔ لیکن ساری دنیا ان کی نبی کی حمایت میں اٹھ کھڑی ہوئی۔ نوپور نے جو کہا وہ غصے میں کی ہوئی بات تھی ۔ وہ دوسرے ترجمان کے الزام کا جواب دے رہی تھی ۔
