نئی دہلی :(ایجنسی)
ہندوستان کے قومی سلامتی کے مشیر (این ایس اے) اجیت ڈوبھال نے اعتراف کیا ہے کہ بی جے پی کی سابق ترجمان نوپور شرما اور دہلی بی جے پی کے ساتھی نوین جندل کے پیغمبر اسلام کے بارے میں متنازع ریمارکس نے ہندوستان کی ساکھ کو نقصان پہنچایا ہے۔
منگل کو خبر رساں ایجنسی اے این آئی کو دیے گئے ایک انٹرویو میں اجیت ڈوبھال نے کہا کہ اس بیان سے بین الاقوامی سطح پر ہندوستان کی ایسی شبیہ بنا دی جو حقیقت سے کسوں دور ہے ۔
این ایس اے سے پوچھا گیا کہ کیا پیغمبر اسلام کے تنازع پر ملک گیر احتجاج سے ہندوستان کی ساکھ کو نقصان پہنچا ہے؟
اس پر انہوں نے جواب دیا، ’’ہاں (اس سے ہندوستان کے وقار پر آنچ آئی ہے) یہ اس معنی میں ہے کہ ہندوستان کو اس طرح پیش کیا گیا ہے یا ہندوستان کے خلاف کچھ ایسی گمراہ کن معلومات پھیلائی گئی ہیں، جو کہ حقیقت سے بعید ہے۔ضرورت تھی کہ ہم ان سے بات کریں انہیں منائیں اور آپ پائیں گے کہ جہاں بھی ہم نے متعلقہ فریق سے بات کی پھر وہ ملک میں ہو یا ملک کے باہر،ہم انہیں منانے میں کامیاب رہے۔ جب لوگ جذباتی طور پر مشتعل ہو جاتے ہیں تو ان کا رویہ قدرےمتضاد ہو جاتا ہے۔‘‘
بی جے پی کی سابق رہنما نوپور شرما نے ایک ٹی وی بحث کے دوران پیغمبر اسلام محمدؐ کے بارے میں متنازعہ بیان دیا تھا۔ اس بیان پر مسلم ممالک نے بھارت کے سامنے باضابطہ احتجاج کیا تھا۔
بھارتیہ جنتا پارٹی نے نوپور شرما کو پارٹی سے معطل کر دیا اور نوین جندل کو نکال دیا۔ تاہم اس کے باوجود ملک کے اندر اس بیان کی زبردست مخالفت ہوئی اور نوپور شرما کی گرفتاری کا مطالبہ کرتے ہوئے مختلف حصوں میں پرتشدد مظاہرے ہوئے۔
