ممبئی :(ایجنسی)
مہاراشٹر میں جاری سیاسی اتھل پتھل کے درمیان ریاستی قانون ساز اسمبلی کے ڈپٹی اسپیکر نرہری جروال نے آسام کے گوہاٹی میں رہ رہے ایکناتھ شندے کیمپ کے 16 باغی شیوسینا ایم ایل ایز کو نااہلی کا نوٹس جاری کیا ہے۔اس کے علاوہ جن 16 ایم ایل ایز کو نااہلی کے نوٹس جاری کیے گئے ہیں، انہیں 27 جون بروز پیر تک اپنا تحریری جواب داخل کرنا ہوگا۔
دوسری طرف باغی شیو سینا لیڈر ایکناتھ شندے گروپ کے ایم ایل ایز نے جمعہ کو ڈپٹی اسپیکر کو ہٹانے کی تجویز لانے پر غور کرنے کیلئے میٹنگ کی تھی۔ ایکناتھ شندے گروپ کے ایم ایل ایز نے اسمبلی کے ڈپٹی اسپیکر نرہری جروال کو ہٹانے کی قرارداد لانے پر غور کیا۔ ذرائع کے مطابق باغی گروپ کے 46 ایم ایل ایز کے دستخطوں کے ساتھ تجویز تیار کرنے کی کارروائی کی جارہی ہے۔
اس سے پہلے سی ایم ادھو ٹھاکرے باغی ایم ایل ایز پر جم کر برسے ۔ انہوں نے کہا کہ اسمبلی انتخابات میں یہ لوگ پارٹی ٹکٹ پر جیتے اور بدلے میں ہمیں دھوکہ دیا۔ کانگریس اور این سی پی آج ہمارا ساتھ دے رہی ہیں ۔ لیکن ہمارے ہی لوگوں نے ہماری پیٹھ میں چھورا گھونپا ہے ۔ انہوں نے کہا کہ میری توہین کرو، لیکن کنبہ کی نہیں۔ میں اقتدار کا لالچی نہیں ہوں۔
