بارہ سالہ بچے کو نابالغ بچوں نے ننگا کرکے پیٹا،جے شری رام اور پاکستان مردہ باد کے نعرے لگواۓ

اندور :مدھیہ پردیش کے اندور ضلع سے وائرل ہونے والا ایک ویڈیو سماجی تنزلی اور ملک کے مستقبل کے بارے میں سوچنے پر مجبور کرتا ہے۔ سوشل میڈیا پر ایک ویڈیو وائرل ہو رہی ہے جس میں کچھ نابالغ بچے کسی دوسرے مذہب کے 12 سالہ بچے کے کپڑے اتار کر زبردستی مذہبی نعرے لگا رہے ہیں۔
اس ویڈیو کے منظر عام پر آنے کے بعد اندور پولیس نے فوری کارروائی کرتے ہوئے سنگین دفعات کے تحت مقدمہ درج کیا اور نابالغ ملزم کو پولیس کی تحویل میں لے لیا۔ خبر یہ بھی ہے کہ اندور پولیس نے متاثرہ بچے کی بھی کونسلنگ شروع کر دی ہے۔
اندور کے ڈی سی پی سورج ورما نے کہا، "کل ایک شکایت کنندہ لسوڈیا پولیس اسٹیشن آیا تھا جس نے شکایت کی تھی کہ اس کے 12 سالہ بچے کو اس کے جاننے والے نابالغ بچے ایک الگ تھلگ جگہ پر لے گئے۔ وہاں بچے کو برہنہ کرکے مارا پیٹا گیا۔ "
انہوں نے مزید بتایا کہ بچوں نے نابالغ پر حملہ کرنے کے علاوہ اس کی ویڈیو بھی بنائی اور اسے سوشل میڈیا پر وائرل کر دیا۔
دی کوئنٹ کی رپورٹ کے مطابق ملزم نابالغوں کے خلاف آئی پی سی اور جوینائل جسٹس ایکٹ کے تحت مقدمہ درج کیا گیا ہے۔
موصولہ اطلاع کے مطابق اندور کے لسوڈیا تھانہ علاقے میں اسٹار کراس روڈ کے پاس کھیلنے کے بہانے کچھ نابالغ دوسرے مذہب سے تعلق رکھنے والے ایک نابالغ کو تالاب کے کنارے لے گئے۔ نابالغ کو تالاب کے کنارے لے جا کر اس کے کپڑے اتار دیے گئے اور اسے جئے شری رام، جئے مہاکال کے ساتھ ساتھ ہندوستان زندہ باد اور پاکستان مردہ باد جیسے مذہبی نعرے لگانے پر مجبور کیا گیا۔
نعرے لگانے والے بچوں نے پورے واقعے کی ویڈیو بھی بنائی جو بعد میں سوشل میڈیا پر تیزی سے وائرل ہوگئی۔ اس کے ساتھ ہی پولیس نے شہریوں سے ویڈیو کو سوشل میڈیا پر وائرل نہ کرنے کی اپیل کی ہے۔