نئی دہلی:(ایجنسی)
دہلی میں تشدد سے متاثرہ جہانگیر پوری میں انہدام کی متنازع مہم کے چند گھنٹے بعد، دہلی بی جے پی کے سینئر لیڈروں نے مرکزی وزیر داخلہ امت شاہ سے مرکزی وزارت داخلہ کے ہیڈکوارٹر میں ملاقات کی۔ سپریم کورٹ نے تخریب کاری مہم پر پابندی لگا دی ہے۔ دہلی کے لیڈروں کے ساتھ امت شاہ کی ملاقات ایک گھنٹے تک جاری رہی۔ میٹنگ میں دہلی بی جے پی کے صدر آدیش گپتا، ایم پی رمیش بیدھوڑی، ایم ایل اے رام بیر بیدھوڑی اور لیڈر منیندر سنگھ سرسا موجود تھے۔
این ڈی ٹی وی کے مطابق لیڈروںنے ملاقات پر کچھ ظاہر نہیں کیا۔ سرسا نے کہا کہ ’یہ ایک باقاعدہ ملاقات تھی۔‘
آدیش گپتا نے شمالی دہلی میونسپل کارپوریشن کے میئر راجہ اقبال سنگھ کو خط لکھا تھا جس میں ان سے اس علاقے میں انسداد تجاوزات مہم چلانے کی درخواست کی گئی تھی جہاں ہفتہ کو ہنومان جینتی کے جلوس کے دوران فرقہ وارانہ جھڑپیں ہوئی تھیں۔ گپتا نے میونسپل کارپوریشن سے کہا تھا کہ وہ’فسادات‘ کی غیر قانونی تعمیرات کی نشاندہی کرے اور انہیں منہدم کرے۔
