شیخ حسینہ کی رخصتی کے بعد پاک-بنگلہ دیش میں بڑھیں نزدیکیاں، دوطرفہ تعلقات مضبوط بنانے پر زور

ڈھاکہ: عوامی انقلاب کے بعد بنگلہ دیش-پاکستان ایک دوسرے کے قریب آرہے ہیں جو بھارت کے لئے اچھی خبر  نہیں ہے -ڈھاکہ ٹریبیون کے مطابق پاکستان نے نئی ویزا پالیسی کا اعلان کر دیا ہے جس کے تحت بنگلہ دیش سمیت 126 ممالک کے شہری بغیر ویزا فیس کے پاکستان کا سفر کر سکیں گے۔ ایک سرکاری ہینڈ آؤٹ کے مطابق، بنگلہ دیش میں پاکستان کے ہائی کمشنر احمد معروف نے اس بات کا اعلان اس وقت کیا جب انہوں نے پیر کے روز داخلہ امور کے مشیر لیفٹیننٹ جنرل (ر) محمد جہانگیر عالم چودھری سے مؤخر الذکر کے دفتر میں  خیرسگالی ملاقات کی۔ انہوں نے دوطرفہ تجارت کو بڑھانے کے لیے دونوں ممالک کے درمیان براہ راست پروازیں بحال کرنے پر زور دیا۔
دونوں ممالک کے درمیان آخری براہ راست پرواز پاکستان انٹرنیشنل ایئر لائنز (پی آئی اے) نے 2018 میں چلائی تھی۔
اس کے علاوہ پاکستان نے بنگلہ دیش کے ساتھ دوطرفہ تعلقات کو مزید مضبوط بنانے اور دوطرفہ تجارت اور کاروبار کو بڑھانے کے لیے دونوں ممالک کے درمیان براہ راست پروازیں دوبارہ شروع کرنے پر زور دیا۔ ملاقات کے دوران انہوں نے سیلاب کے بعد بحالی کے پروگرام، دوطرفہ تعلقات میں مزید بہتری، ویزا کے عمل میں نرمی، دونوں ممالک کے درمیان براہ راست پرواز کے آپریشن اور زرعی تحقیق میں تعاون جیسے وسیع تر دو طرفہ امور پر تبادلہ خیال کیا۔
ملاقات کے آغاز میں، مشیر نے ہائی کمشنر کا خیرمقدم کیا اور انہیں ملک کے جنوب مشرقی علاقے میں آنے والے حالیہ تباہ کن سیلاب کے بارے میں آگاہ کیا۔ہائی کمشنر نے مشیر کو سیلاب متاثرین کی مدد کی یقین دہانی کرائی۔
ہائی کمشنر نے نشاندہی کی کہ بنگلہ دیش میں حالیہ امتیازی سلوک کے خلاف طلبہ کی تحریک نے پاکستان پر بھی اثر ڈالا اور کہا کہ بہت سے پاکستانی شہریوں نے بنگلہ دیشی پرچم لہرا کر طلبہ اور عوام کی جیت کا جشن منایا۔
موجودہ عبوری حکومت کے بڑے چیلنجز کے بارے میں مشیر نے انہیں بتایا کہ حکومت کا سب سے بڑا چیلنج کرپشن کی روک تھام اور اشیائے ضروریہ کی قیمتوں کو کنٹرول کرنا ہے۔