جمعیت چلڈرن ویلیج اسکول کی اسٹوڈنٹ آگریہ ساجدہ نے 98فیصد نمبرکے ساتھ کچھ بھج میں ٹاپ کیا

نئی دہلی : جمعیۃ علماء ہند کے زیر اہتمام چلنے والا شاہ زکریا پبلک اسکول جو جمعیۃ چلڈرن ولیج انجار ( کچھ گجرات ) میں واقع ہے ، اس نے ریاست میں نمایاں مقام حاصل کیاہے ، اس اسکول کی بارہویں کی طالبہ آگریہ ساجد ہ نے 98.2فی صد نمبر کے ساتھ پورے کچھ بھج خطہ میں سر فہرست مقام حاصل کیا ہے ، جب کہ اسکول کی بارہویں میں صد فی صد کامیابی درج ہوئی ہے، اس کے علاوہ دسویں کے امتحان میں اسکول کی کامیابی ۸۶ فیصد رہی ہے ۔ بارہویں میں آگریہ ساجدہ اور آگریہ فردوس نے بھی 90فی صد سے زائد نمبرات حاصل کیے ہیں۔
اس موقع پر اپنے بیان میں مولانا حکیم الدین قاسمی ناظم عمومی جمعیۃ علما ء ہند نے اعلیٰ کامیابی حاصل کرنے والی طالبات ، اسکول انتظامیہ بالخصوص اسکول پرنسپل رحیمہ بین قریشی، مفتی انیس پرتاپ گڑھی اور اساتذہ کو مبارک باددی اور کہا کہ یہ خود جمعیۃ علماء ہند اور اس ادارہ کے بانیوں اور سرپرستوں کے لیے مسرت کا موقع ہے ۔انھوں نے کہا کہ صدر جمعیۃ علماء ہند مولانا محمود اسعدمدنی جو ادارے کے سرپرست ہیں، وہ اس کامیابی سے مسرور ہیں اور ان کی طرف سے بھی مبارکبادقبول کریں ۔
واضح ہو کہ جمعیۃ چلڈرن ولیج کچھ (انجار) میں سال 2001 میں آئے بھیانک زلزلہ کے بعد یتیم بچوں کے لیے قائم کیا گیا ، اس کا قیام مولانا سید اسعد مدنی ؒ سابق صدر جمعیۃ علماء ہند کے ہاتھوں عمل میں آیا تھا ۔یہ ادارہ زیادہ تر ایسے بچے اور بچیوں کی کفالت کرتا ہے جن کا کوئی سہار ا نہیں ہے ۔ اس کے علاوہ یہاں انگلش اور گجراتی میڈیم کے بارہویں تک اسکول بھی قائم ہیں ، یہاں کے طلبہ بھارت اسکائوٹ اینڈ گائیڈ کی تربیت پاکر کئی گورنر ایوارڈحاصل کرچکے ہیں۔حال میں ہی بھارت اسکائوٹ اینڈ گائیڈ کے تحت 14؍طلبہ اور4 ؍ طالبات گورنر ایوارڈ کے لئےمنتخب ہوئے۔