دہلی کے پانچ ستارہ ہوٹل میں محمود مدنی کے بلاوے پر یو سی سی پر اہم مشاورتی میٹنگ،کئی ممبران پارلیمنٹ بھی شریک

نئی دہلی:جمعیة علماءہند کے صدر مولانا محموداسعد مدنی کی دعوت پردہلی کے اوبرائےہوٹل میں مجوزہ یکساں سول کوڈ (یو سی سی) کے سلسلے میں منعقد ایک اہم اجتماع میں کئی ممبران پارلیمنٹ اورملی تنظیموں کے کئی اہم رہنما شریک ہوئے۔ اس اجتماع میں یوسی سی سے متعلق خدشات بالخصوص مسلم اقلیت اور قبائلی برادری کے ثقافتی اور مذہبی حقوق کے سلب کیے جانے پر خاص طور پر گفتگو ہوئی۔
اس موقع پر اپنے افتتاحی خطاب میں مولانا محمودمدنی نے کہا کہ یکساں سول کوڈ سے مذہبی تنوع ، اقلیتوں کے حقوق اور مساوات و انصاف کے آئینی اصولوںکو نقصان پہنچنے کا خدشہ ہے۔انھوں نے اس بات پر زور دیا کہ ہندستان کی طاقت اس کے بھرپور ثقافتی اور مذہبی تنوع میں مضمر ہے، اگر یونیفارم سول کوڈ نافذ ہوا تو ممکنہ طور پر اس تنوع کو نقصان پہنچے گا۔
مولانا مدنی نے مسلم کمیونٹی کے حقوق اور مفادات کے تحفظ کی ضرورت بھی زور دیا۔ اس موقع پر سپریم کورٹ کے معروف وکیل ایم آرشمشاد نے پاور پوائنٹ کے ذریعہ یونیفارم سول کوڈ کے ممکنہ نقصانات پر تفصیل سے روشنی ڈالی۔ انھوں نے اپنے دلائل سے یہ بھی ثابت کیا کہ یہ قانون مسلم خواتین کے لیے بھی نقصان دہ ہے۔ انھوں نے مثال سے ثابت کیا کہ مسلم پرسنل لا (شریعت ایکٹ) کے تحت پورے خاندان کی کفالت کا بوجھ شوہریا والد پر عائد ہوتا ہے،لیکن جس برابری کی بنیاد پر یکساں سول کوڈ کو لایا جارہا ہے اس سے نفقہ کا بوجھ بیوی/ماں کی طرف بھی یکساں طور پر عائد ہو جائے گا۔ ساتھ ہی مسلم خواتین، نکاح کے وقت مہر، ماں ، بیٹی ، بہن اور بیوی کی شکل میں الگ الگ حلقوں سے جائیداد میں حصہ پانے کے حق سے بھی محروم ہو جائیں گی۔
میٹنگ میں موجودممبران پارلیمنٹ نے اپنے خیالات کا اظہارکرتے ہوئے کہا کہ کسی بھی بڑی قانون سازی پہلے متعلقہ طبقوں کے خدشات کو دور کرنے کی اہمیت سے انکار نہیں کیاجاسکتا۔ انھوں نے جمعیة علماءہند کے خیالات اور خدشات کو بغور سنا اور سیکولرازم،اجتماعیت اور سماجی ہم آہنگی کی اقدار کو برقرار رکھنے کے لیے اپنی حمایت کا یقین دلایا۔ممبران پارلیمنٹ نے کہا کہ موجودہ سرکار سیاسی مقصد سے ایسے مسئلوں کو دانستہ اٹھارہی ہے ، جب کہ وہ اب تک ڈرافٹ لانے سے قاصر ہے ، اس لیے ہمیں ڈرافٹ آنے کا انتظار کرنا چاہیے۔ اگر یونیفارم سول کوڈ کے ذریعہ آئین کے بنیادی حقوق کی خلاف ورزی ہوئی تو ہم پارلیامنٹ میں حتی الوسع ان مسئلوں کو اٹھائیں گے۔اخیر میں ناظم عمومی جمعیةعلماءہند مولانا حکیم الدین قاسمی نے تمام مہمانوں کا شکریہ ادا کیا۔
اجتماع میں جو ممبران پارلیمنٹ شریک ہوئے ان میں کارتی پی چدمبرم کانگریس، حسنین مسعودی نیشنل کانفرنس،  محبوب علی قیصر ایل جی پی ، ڈاکٹر محمد جاوید کانگریس،کنور دانش علی بی ایس پی ، ای ٹی محمد بشیر انڈین مسلم لیگ ،عبدالصمد صمدانی انڈین مسلم لیگ، عمران پرتاپ گڑھی کانگریس شامل ہیں، جب کہ منتخب ملی جماعتوں سے سعادت اللہ حسینی امیر جماعت اسلامی ہند،ملک معتصم نائب امیر جماعت اسلامی ہند،مولانا اصغر علی امام مہدی سلفی، امیر مرکز جمعیت اہل حدیث ہند، مولانا حکیم الدین قاسمی جنرل سکریٹری جمعیة علماءہند ، کمال فاروقی مولانا ڈاکٹر یاسین علی عثمانی آل انڈیا ملی کونسل، ایم آر شمشاد ایڈوکیٹ سپریم کورٹ ،مولانا نیاز فاروقی سکریٹری جمعیة علماءہند، اویس سلطان خان وغیرہ شامل ہوئے۔