رامپور :(آر کے بیورو)
سماج وادی پارٹی کے قد آور لیڈر اعظم خاں کے خلاف عظیم نگر اور ملک کوتوالی میں درج پانچ مقدمات میں ان کی رہائی کی اجازت سیتا پور جیل انتظامیہ کو بھیج دی گئی ہے۔ رہائی کے اجازت نامے پیر کی شام ایک خصوصی میسنجر کے ذریعے بھیجے گئے۔ ایس پی ایم پی اعظم خاں دو سال سے زیادہ عرصے سے سیتا پور جیل میں بند ہیں۔
اعظم خاں کے خلاف رام پور کے مختلف تھانوں میں لوٹ، ڈکیتی، ڈرانے دھمکانے، چوری، زمین پر قبضے وغیرہ کے الزام میں 87 مقدمات درج ہیں۔ یہ مقدمات مختلف عدالتوں میں چل رہے ہیں۔ جس میں صرف ایک معاملہ میں ان کی ضمانت منظورہونا رہ گئی ہے ۔باقی تمام کیسوں میں ان کی ضمانت منظور ہو چکی ہے ، جبکہ ان کی اہلیہ ڈاکٹر تزئین فاطمہ اور ان کا بیٹا عبداللہ اعظم ضمانت پر باہر آچکے ہیں۔
اعظم خاں کے خلاف سال 2019 میں عظیم نگر پولیس اسٹیشن میں کسانوں کی زمین قبضہ کرنےاور ملک میں ماڈل ضابطہ اخلاق کی خلاف ورزی کے معاملے میں مقدمات درج کیے گئے تھے، جس میں تفتیش کے بعد پولیس نے عدالت میں چارج شیٹ داخل کی تھی۔ ان مقدمات کی سماعت ایم پی-ایم ایل اے کورٹ (مجسٹریٹ ٹرائل) میں چل رہی ہے۔
ان مقدمات میں اعظم خاں کی ضمانت منظور کر لی گئی ہے۔ ماضی میں، ان کے وکیل کی جانب سے ضمانتیں دائر کی گئی تھیں، جن کی تصدیق کے بعد، پیر کی شام، عدالت نے اعظم خاں کو پانچ مقدمات میں رہا کرنے کے لیے خصوصی میسنجر کے ذریعے سیتا پور جیل بھیج دیا ہے۔
اعظم خاں کے تین معاملات میں سماعت نہیں ہوئی
دریں اثناء رام پور کے ڈنگر پور کے تین معاملات میں ایس پی کے قد آ ور لیڈر اعظم خاں کے خلاف درج تین مقدمات کی سماعت عدالت میں نہیں ہو سکی،کیونکہ پریذائیڈنگ آفیسر چھٹی پر تھے۔ اب اس معاملے کی اگلی سماعت 30 مارچ کو ہوگی۔ سال 2019 میں، ڈنگر پور بستی میں رہنے والے لوگوں نے اعظم خاں اور کچھ ایس پی کارکنان پر یہ الزام لگاتے ہوئے مقدمے درج کرائے تھے کہ ان کے ساتھ اعظم خاں کے اشارے پر مار پیٹ، لوٹ پاٹ کرکے ان کے مکانوں کو توڑ دیا گیا تھا۔ جس میں اعظم خاں سمیت کئی ایس پی کارکنان ملزم ہیں ۔
اس معاملے میں گنج پولیس تھانے میں 12 معاملے درج کیے گئے تھے۔ جس میں تمام مقدمات میں اعظم خاں کی ضمانت منظور کر لی گئی ہے۔ اس کیس کی سماعت ایم پی ایم ایل اے کورٹ (سیشن ٹرائل) میں چل رہی ہے۔ گزشتہ تاریخ کو اعظم خاں کے وکیل نے گنج پولیس اسٹیشن میں درج تین مقدمات میں ڈسچارج درخواست دائر کی تھی۔
جس پر استغاثہ کی جانب سے پیر کو اعتراض دائر کیا جانا تھا۔ اسسٹنٹ گورنمنٹ ایڈووکیٹ کمل کمار گپتا نے بتایا کہ پریذائیڈنگ آفیسر کے چھٹی پر ہونے کی وجہ سے ان مقدمات کی سماعت نہیں ہو سکی۔ اب اس معاملے کی سماعت 30 مارچ کو ہوگی۔
عبداللہ اعظم کے دو پاسپورٹ معاملےمیں گواہ عدالت نہیں پہنچے
وہیں اعظم خاں کے بیٹے عبداللہ اعظم کے دو پاسپورٹ کے معاملے میں پیر کو رام پور میں ایم پی-ایم ایل اے کورٹ (مجسٹریٹ ٹرائل) میں سماعت ہوئی، جس میں گواہ عدالت نہیں پہنچے۔ اب اس معاملے کی اگلی سماعت یکم اپریل کو ہوگی۔ سال 2019 میں بی جے پی لیڈر آکاش سکسینہ نے اعظم خاں کے بیٹے عبداللہ اعظم کے خلاف سول لائنز تھانے میں دو پاسپورٹ رکھنے کا مقدمہ درج کرایا تھا، جس میں عدالت نے عبداللہ اعظم کی ضمانت منظور کر لی ہے۔
اس کیس کی سماعت ایم پی ایم ایل اے کورٹ مجسٹریٹ ٹرائل میں چل رہی ہے۔ پیر کو ایک اسکول کے پرنسپل سے اس معاملے میں جانچ ہونی تھی، لیکن وہ عدالت نہیں پہنچے۔ عدالت نے سماعت کرتے ہوئے اگلی سماعت کے لیے یکم اپریل کی تاریخ مقرر کی ہے۔
