اعظم خاں کا ‘گھر’بھی چھین لیا گیا

لکھنؤ۔ سماج وادی پارٹی کے قدآور لیڈر اعظم خان کو ایک اور جھٹکا لگا ہے۔ اعظم خان کو لکھنؤ میں سرکاری رہائش گاہ سے نکال دیا گیا ہے جہاں سے وہ تقریباً چار دہائیوں تک اپنی سیاست چلاتے تھے۔ پہلے نفرت انگیز تقاریر کیس میں سزا سنائے جانے کے بعد اسمبلی کی رکنیت منسوخ کر دی گئی۔ اس کے بعد بی جے پی کے آکاش سکسینہ نے ضمنی انتخاب میں رام پور سیٹ سے ان کے امیدوار عاصم راجا کو شکست دی۔ جس کے بعد اب اسٹیٹ پراپرٹی ڈیپارٹمنٹ نے ان کی سرکاری رہائش گاہ کی الاٹمنٹ منسوخ کر دی ہے۔ اب یہ مکان بی جے پی کے ایم ایل اے آکاش سکسینہ کو الاٹ کر دیا گیا ہے۔بدھ کی شام ریاست کے محکمہ جائیداد نے دارالشفاء میں بی جے پی کے نو منتخب ایم ایل اے آکاش سکسینہ کو سرکاری مکان 34B الاٹ کر دیا ہے۔ قابل ذکر بات یہ ہے کہ گزشتہ 40 دہائیوں سے دارالشفاء میں سرکاری رہائش گاہ 34B ان کے پاس یا ان کے قریبی لوگوں کے پاس رہی۔ لیکن رام پور قلعہ کے گرنے سے یہ بنگلہ جو اعظم کے سیاسی سفر کا گواہ تھا، بھی ان سے چھن گیا ہے۔ بتا دیں کہ جب اعظم خان سیتا پور جیل سے رہا ہو کر لکھنؤ پہنچے تو وہ اسی بنگلے میں ٹھہرے تھے۔