دہلی کے ہنسراج کالج میں نان ویج پر پابندی

نئی دہلی: ہنس راج کالج کی پرنسپل راما شرما نے بدھ کے روز بڑے پیمانے پر تنقید کا سامنا کرنے کے باوجود ہاسٹل اور کینٹین میں نان ویج کھانا بند کرنے کا حکم واپس لینے سے انکار کردیا اور زور دیا کہ ڈی یو کا یہ کالج آریہ سماج کے فلسفے کی پیروی کرتا ہے۔ پی ٹی آئی سے بات کرتے ہوئے شرما نے یہ بھی دعویٰ کیا کہ 90 فیصد طلبہ سبزی خور ہیں اور انہوں نے پہلے بھی ہاسٹل میں نان ویج کھانے پر احتجاج کیا تھا۔
نیوز١٨کے مطابق ہنسراج کالج کے پچھلے سال فروری میں کووڈ۔19 کے بعد دوبارہ کھلنے کے بعد اس کی کینٹین اور ہاسٹل میں نان ویجیٹیرین کھانا پیش کرنا بند کرنے کے فیصلے پر کئی حلقوں کی طرف سے شدید تنقید ہوئی ہےاگرچہ طالب علموں نے دعوی کیا کہ اس معاملے میں کوئی نوٹس جاری نہیں کیا گیا تھا، لیکن شرما نے واضح کیا کہ ایک نوٹس جاری کیا گیا تھا اور ہاسٹل پراسپیکٹس میں ذکر کیا گیا تھا کہ ہاسٹل میں کوئی بھی نان ویج کھانا نہیں دیا جائے گا۔ انھوں نے کہا کہ ہم نان ویج فوڈ سے متعلق نوٹس واپس لینے والے نہیں ہیں۔ یہ آریہ سماج کالج ہے۔ ہمارا اپنا فلسفہ ہے اور اسی وجہ سے ہم نان ویج کھانا پیش نہیں کریں گے۔ ہم باقاعدگی سے ہون کرتے ہیں۔ ہم اپنےاصولوں کی پیروی کرتے ہیں۔ ہاسٹل کے پراسپیکٹس میں لکھا ہے کہ ہاسٹل میں نان ویج کھانا نہیں دیا جائے گا۔
شرما نے مزید کہا کہ ہم سینٹ اسٹیفن (کالج) سے ’ہون‘ کرنے کے لیے نہیں کہتے۔ ہم خالصہ کالج کے قوانین میں مداخلت نہیں کرتے۔ پھر ہم سے کیوں پوچھ گچھ کی جا رہی ہے؟ ہم یہ نہیں کہتے کہ نان ویج کھانا مت کھاؤ۔ ہم صرف یہ کہہ رہے ہیں کہ کالج میں نان ویج کھانا مت لائیں‘