بی جے پی لیڈر کا دعوی:یوپی میں بغیر رشوت بی جے پی والوں کا بھی کام نہیں ہوتا نہ ہوگا

لکھنؤ:کیا اتر پردیش کے بی جے پی ایم ایل اے شیام پرکاش کو وزیر اعظم نریندر مودی اور وزیر اعلی یوگی آدتیہ ناتھ کی طرف سے بدعنوانی کو کم کرنے کے لیے اٹھائے گئے اقدامات پر بھروسہ نہیں ہے؟ یہ سوال ایم ایل اے کے فیس بک اکاؤنٹ سے کیے گئے تبصرے کے بعد پیدا ہوا ہے۔ ایم ایل اے نے کہا ہے کہ بی جے پی کارکنوں کا کوئی بھی کام رشوت دیے بغیر نہیں ہوا ہے اور آئندہ کبھی نہیں ہوگا۔
شیام پرکاش اتر پردیش کے ہردوئی ضلع کی گوپاماؤ اسمبلی سیٹ سے ایم ایل اے ہیں۔ اس تازہ ترین تبصرہ کو ہتھیار کے طور پر استعمال کرتے ہوئے ایس پی نے ایک بار پھر بی جے پی اور پی ایم مودی کو نشانہ بنایا ہے۔ 2014 کے لوک سبھا انتخابات میں جب بی جے پی نے این ڈی اے کی جانب سے نریندر مودی کو وزیر اعظم کا چہرہ بنایا تو پارٹی کی طرف سے دیا گیا ایک نعرہ بہت مقبول ہوا۔ نعرہ تھا ’’بہت ہوگیا بھرشٹاچار، اس بار مودی سرکار‘‘۔ 2024 کے انتخابات میں بھی پی ایم مودی نے کہا – ہماری تیسری مدت میں بدعنوانی پر حملہ تیز ہوگا، یہ مودی کی گارنٹی ہے۔ لیکن ایسا لگتا ہے کہ خود بی جے پی ایم ایل اے کو مودی کی گارنٹی پر بھروسہ نہیں ہے۔
لیکن مرکز میں مودی حکومت کے 10 سال اور اتر پردیش میں یوگی کے 7 سال کے اقتدار کے بعد، پارٹی کے ایم ایل اے خود اتر پردیش میں بدعنوانی کے بارے میں کھل کر بات کر رہے ہیں۔ وہ یہ بھی کہہ رہے ہیں کہ رشوت کے بغیر کام نہ کبھی ہوا ہے اور نہ کبھی ہوگا۔
اس سال مئی کے مہینے میں بھی گجرات سے بی جے پی کے راجیہ سبھا ایم پی رام موکریا نے ایسا ہی بیان دیا تھا اور کہا تھا کہ ریاست میں کوئی بھی افسر بغیر جیب گرم کئے  کام نہیں کرتا۔ انہوں نے اعتراف کیا تھا کہ ریاست میں بدعنوانی میں اضافہ ہوا ہے۔ ایک گجراتی روزنامہ سندیش کو دیئے گئے انٹرویو میں ایم پی نے کہا تھا کہ انہوں نے فائر این او سی حاصل کرنے کے لیے ڈپٹی فائر آفیسر کو 70 ہزار روپے رشوت دی تھی اور جب وہ ایم پی بنے تو ڈپٹی فائر آفیسر نے انہیں یہ رقم واپس کردی تھی۔ .