نئی دہلی :(ایجنسی)
کرناٹک حکومت کی جانب سے اسکول یونیفارم آرڈر پر نظر ثانی کے اشارے اور یونیفارم ڈریس کوڈ پر مدھیہ پردیش کے وزیر تعلیم کے بیان سے بی جے پی کی دوری کے درمیان، بی جے پی قیادت میں حجاب تنازع کی وجہ سےالگ الگ مقامات پر چل رہےمظاہروں کو لے کربےچینی بڑھ گئی ہے۔
ذرائع کے مطابق یہ احساس ہے کہ کرناٹک حکومت اور ریاستی بی جے پی یونٹ نے طالبات کے ایک چھوٹے سے گروپ کو اُڈپی کے کچھ کالجوں میں احتجاج کرنے کی اجازت دی تاکہ یہ پھیلے، ہائی کورٹ تک پہنچےاور قومی مباحثوں میں شامل ہو ۔
پارٹی قیادت کے ایک حصوںمیں بےچینی ان تصویروںکےآنے کے بعد اورگہری ہو گئی ہے جس میں مردوں کے احتجاج کے باوجود کلاس جاتی طالبات ، اسکولی طالبات اوریہاں تک کہ ٹیچروں کو بھی اپنے سر سے اسکارف کو ہٹانے کےلئے مجبور کیاجانا اورکچھ کو اسکول گیٹ سے ہی گھر جانے کےلیے کہا جانا شامل ہے ۔
اس تنازع پر ایک مرکزی وزیر نے کہا کہ یہ ایسے وقت میں ہو رہا ہے جب ہم بیٹی بچاؤ، بیٹی پڑھاؤ مہم چلا رہے ہیں، جب وزیر اعظم نے مسلم خواتین کو بااختیار بنانے کے لیے تین طلاق جیسے قوانین پر پابندی لگا دی ہے۔
دہلی میں بی جے پی کے سینئر لیڈروں نے بھی اس معاملے پر اپنے خیالات کا اظہار کرنے سے انکار کر دیا۔ جب اپوزیشن نے یہ معاملہ لوک سبھا میں اٹھایا تو کولار کے ممبرپارلیمنٹ ایس منیس سوامی کو چھوڑ کر بی جے پی کے بیشتر ارکان پارلیمنٹ خاموش رہے۔ یہاں تک کہ تیجسوی سوریہ جو کہ اشتعال انگیز تقریریں کرنے میں ماہر ہیں، خاموش رہے۔
جہاں تریپورہ کے وزیر تعلیم نے اس تنازع پر تشویش کا اظہار کیا، وہیں این ڈی اے کے زیر اقتدار بہار کے وزیر اعلیٰ نتیش کمار نے کہا کہ بہار میں حجاب کوئی مسئلہ نہیں ہے اور یہاں تمام مذہبی جذبات کا احترام کیا جاتا ہے۔ بی جے پی کی حکومت والی ہماچل پردیش کے وزیر تعلیم گووند سنگھ ٹھاکر نے کہا کہ ابھی تک اسکولوں میں یکساں ڈریس کوڈ پر کوئی غور نہیں کیا جا رہا ہے۔
بی جے پی کے ایک اور رہنما نے کہا کہ پارٹی اس مسئلے کے بارے میں فکر مند ہے کہ ایسا نہ ہو کہ یہ سی اے اے مخالف مظاہروں جیسی تحریک میں بدل جائے، جس میں مسلم خواتین سب سے آگے تھیں۔ بی جے پی لیڈر نے کہا کہ سی اے اے پر اپنے جوش و خروش اور مہم چلانے کے باوجود حکومت نے ابھی تک دسمبر 2019 میں منظور ہونے والے قانون کے لیے قواعد وضع نہیں کیے ہیں۔
ذرائع کا کہنا ہے کہ سی اے اے کے برعکس حجاب کا تعلق براہ راست مذہبی جذبات اور خاندان سے ہے۔ ایک لیڈر نے کہا کہ اس طرح کا ضابطہ اس وقت متاثر ہو سکتا ہے جب پہلے سے کہیں زیادہ مسلم لڑکیاں اسکول اور کالج جا رہی ہوں۔
ساتھ ہی مرکزی وزیر نے کہا کہ کرناٹک کے مسئلہ کو کیسے حل کیا جائے اس پر بھی بات چیت ہوئی۔ ایسی تجاویز سامنے آئی ہیں کہ ریاست یہ موقف اپنا سکتی ہے کہ لڑکیاں سر ڈھانپنے کے لیے دوپٹہ استعمال کر سکتی ہیں۔ جو لباس کا حصہ ہے۔ ایسا لگتا ہے کہ اعلیٰ قیادت اس معاملے پر زیادہ سخت ہونے کی بجائے درمیانی راستہ تلاش کرنا چاہتی ہے۔ پارٹی کے ایک رہنما نے یہ بھی کہا کہ قومی قیادت کو یہ پسند نہیں ہے کہ جب کوئی ریاست کوئی تنازع کھڑا کرتی ہے، اسے بھڑکنے دیتی ہے اور پھر اسے حل کرنے کے لیے قومی قیادت کی عدالت میں پھینک دیتی ہے۔
ذرائع کے مطابق دہلی میں پارٹی لیڈروں کا خیال تھا کہ کرناٹک میں جاری حجاب تنازع بہت چھوٹا ہے جسے آسانی سے حل کیا جا سکتا تھا۔ تاہم، کرناٹک کے وزیر اعلیً بسواراج بومئی کے قریبی لوگوں کا کہنا ہے کہ ان پر الزام لگانا غیر منصفانہ ہے اور اس کی ذمہ داری پارٹی کی ریاستی اکائی پر عائد ہوتی ہے۔ سوال اٹھاتے ہوئے ایک رہنما نے کہا کہ انہوں نے معاملے کو پرسکون کرنے کے لیے کیا کیا؟ وہ حکومت کے دفاع کے لیے بھی موجود نہیں تھے۔ پارٹی لیڈروں کے مطابق بومئی کا پارٹی کیڈر پر زیادہ کنٹرول نہیں ہے۔
مدھیہ پردیش میں، وزیر اعلیٰ شیوراج سنگھ چوہان اور وزیر داخلہ نروتم مشرا، جو اپنے بیانات کے لیے مشہور ہیں، نے بھی وزیر تعلیم اندر سنگھ پرمار کے یونیفارم ڈریس کوڈ کے ریمارکس سے خود کو الگ کر لیا۔ سمجھا جاتا ہے کہ شیوراج چوہان نے کابینہ کی میٹنگ میں وزراء کی سرزنش بھی کی اور حکومت سے مشورہ کیے بغیر تبصرہ نہ کرنے کو کہا۔ تاہم بعد میں پرمار نے یہ بھی کہا کہ یونیفارم ڈریس کوڈ کے بارے میں ابھی کوئی منصوبہ نہیں ہے۔
وزیر داخلہ نروتم مشرا نے اپنے حلقہ انتخاب دتیا کے ایک کالج میں دائیں بازو کے گروپوں کی طرف سے حجاب پہننے والی دو خواتین کو ہراساں کیے جانے پر اپنی ناراضگی کو واضح کیا۔ مشرا نے ضلع کلکٹر کو اس بات کی جانچ کرنے کا حکم دیا کہ کالج نے مذہبی لباس کے خلاف حکم کیوں جاری کیا ہے۔ پارٹی کے ایک سینئر رہنما نے اعتراف کیا کہ اعلیٰ قیادت نے حجاب کے معاملے کو نہ بڑھانے کی ہدایت کی تھی۔ انہوں نے کہا کہ یہ کبھی بھی بی جے پی کا مسئلہ نہیں ہے اور پارٹی کبھی بھی اس معاملے کو بڑھانا نہیں چاہتی ہے۔
