راہل کے خلاف بی جے پی کی خواتین ممبران پارلیمنٹ نے اسپیکر سے شکایت کی

دہلی : پارلیمنٹ کی رکنیت بحال ہونے کے بعد لوک سبھا میں آج راہل گاندھی نے پہلی مرتبہ خطاب کیا ۔ حالانکہ اس دوران وہ تنازعات میں گھرتے ہوئے نظر آرہے ہیں۔ آج عدم اعتماد کی تحریک پر بحث کے دوران پارلیمنٹ میں انہوں نے فلائنگ کس کیا ۔ راہل گاندھی کے اس ردعمل کے خلاف بی جے پی کی 22 خواتین ممبران پارلیمنٹ کی طرف سے لوک سبھا اسپیکر سے شکایت درج کرائی گئی ہے۔ وہیں مرکزی وزیر اسمرتی ایرانی نے اس کو نازیبا بتایا ہے۔ ۔
راہل گاندھی جب اپنی تقریر ختم کرنے کے بعد پارلیمنٹ سے باہر نکل رہے تھے تو ایک ایسا واقعہ پیش آگیا، جس پر خواتین ممبران پارلیمنٹ نے اعتراض کیا ہے ۔ اس وقت مرکزی وزیر اسمرتی ایرانی عدم اعتماد کی تحریک کے خلاف تقریر کررہی تھیں۔ حالانکہ راہل گاندھی کے ردعمل کا وہ لمحہ کیمرے میں قید نہیں ہوپایا ہے۔ میڈیا رپورٹس کے مطابق اس لمحہ کے گواہ رہے لوگوں کے مطابق جب راہل گاندھی اپنی تقریر کے بعد لوک سبھا ایوان سے باہر نکل رہے تھے تو ان کی کچھ فائلیں گر گئی تھیں ۔ جیسے ہی وہ انہیں اٹھانے کیلئے جھکے تو کچھ بی جے پی ممبران پارلیمنٹ ان پر ہنسنے لگے ۔اس پر راہل گاندھی نے بی جے پی ممبران پارلیمنٹ کی طرف فلائنگ کس کیا اور ہنستے ہوئے باہر چلے گئے ۔