بہار میں ٹیچروں کی بمپر بھرتی،ایک لاکھ78ہزار اسامیوں پر کابینہ کی مہر

بہار میں بے روزگار نوجوانوں کو نتیش حکومت نے بڑی خوشخبری سنائی ہے۔ ٹیچر بھرتی کا انتظار کر رہے لوگوں کے لیے یہ خبر خوش آئند ہے کہ 1 لاکھ 78 ہزار ٹیچر بحالی پر کابینہ کی مہر لگ گئی ہے۔ یہ جانکاری بہار کے نائب وزیر اعلیٰ تیجسوی یادو نے ایک ٹوئٹ کے ذریعہ دی ہے۔ اب امید کی جا رہی ہے کہ جلد ہی ٹیچر بھرتی کے لیے نوٹیفکیشن جاری ہو سکتا ہے۔
تیجسوی یادو نے سوشل میڈیا پر اپنے ایک پوسٹ میں لکھا ہے کہ ’’نوجوانوں کے لیے خوشخبری! بہار میں نوکریاں ہی نوکریاں۔‘‘ وہ آگے لکھتے ہیں ’’مہاگٹھ بندھن کی بہار حکومت نے آج کابینہ میں 178000 سے زیادہ ٹیچرس کی بحالی پر مہر لگا دی ہے۔ جلد ہی تقرری کا عمل شروع ہو جائے گا۔‘‘ اس پوسٹ میں وہ یہ بھی لکھتے ہیں کہ ’’کابینہ میں کچھ دن پہلے ہی بہار پولیس میں 75 ہزار 543 عہدوں پر تقرری کی منظوری دی گئی تھی۔ اس میں 68 ہزار 360 عہدوں پر براہ راست بھرتیاں ہوں گی۔‘‘
واضح رہے کہ ان بھرتیوں کے لیے نوٹیفکیشن بہار پبلک سروس کمیشن کی طرف سے جاری ہو سکتا ہے۔ کابینہ سے پاس ہونے کے بعد ٹیچرس کی بھرتی ریاست کے سبھی ضلعوں میں ہوگی۔ اس کے لیے سبھی ضلعوں سے ریزرویشن روسٹر مانگے جائیں گے۔ روسٹر ملنے کے بعد عہدوں کی تقسیم ہوگی۔ نوٹیفکیشن میں ریاست وار اور کیٹگری وار بھرتیوں کی تفصیل دی جائے گی