نیوز کلک پر اب سی بی آئی کے چھاپے،FCRAکی خلاف ورزی کا معاملہ درج

سی بی آئی نے نیوز پورٹل نیوز کلک کے ذریعہ فارن کنٹری بیوشن ریگولیشن ایکٹ (ایف سی آر اے) کی مبینہ خلاف ورزی پر ایف آئی آر درج کی ہے۔ اس کے علاوہ بدھ کو دو مقامات پر چھاپے مارے گئے۔ نیوز کلک کے بانی پربیر پورکیاستھ کی رہائش گاہ اور دفتر کی تلاشی لی۔ پورکایستھ کو حال ہی میں دہلی پولیس نے غیر قانونی سرگرمیوں کی روک تھام ایکٹ کے تحت ایک کیس میں گرفتار کیا تھا۔
ایک اہلکار نے امراجالا کے ذرائع کوبتایا کہ پورٹل پر الزام ہے کہ اس نے فارن کنٹری بیوشن ریگولیشن ایکٹ (ایف سی آر اے) کی خلاف ورزی کرتے ہوئے غیر ملکی عطیات وصول کیے ہیں۔ اس سے قبل دہلی پولیس نے ایف آئی آر میں الزام لگایا تھا کہ کمیونسٹ پارٹی آف چائنا کے ایک سرگرم رکن نیویل رائے سنگھم نے دھوکہ دہی سے غیر ملکی فنڈز کی سرمایہ کاری کی تھی۔ تاہم پورٹل نے ان الزامات کی تردید کی ہے۔

نئی دہلی:سی بی آئی نے بدھ کو منی لانڈرنگ کے ایک مبینہ معاملے میں نیوز کلک کے خلاف مقدمہ درج کیا۔ دہلی میں دو مقامات پر تلاشی لی ابھی منگل کو ہی دہلی کی ایک عدالت نے پربیر پورکایست اور نیوز کلک کے ایچ آر ہیڈ امیت چکرورتی کو 10 دن کی عدالتی حراست میں بھیج دیا تھا۔ دونوں پر یو اے پی اے بھی لگا دیا گیا ہے۔ ستیہ ہندی کے مطابق حکومت نے نیوز کلک پر الزام لگایا ہے کہ نیوز پورٹل نے چین نواز پروپیگنڈہ پھیلانے کے لیے پیسے لیے تھے۔ تاہم اس الزام کی نیوز کلک نے بہت پہلے اور اب عدالت میں بھی تردید کی ہے۔ 3 اکتوبر کو پورکایستھ اور چکرورتی کو گرفتار کیا گیا اور نیوز کلک کے دفتر کو سیل کر دیا گیا۔
ایف آئی آر کے مطابق نیوز پورٹل کو فنڈز کی ایک بڑی رقم چین سے "ہندوستان کی خودمختاری میں خلل ڈالنے” اور ملک کے خلاف عدم اطمینان پیدا کرنے کے لیے آئی۔ اس میں یہ بھی الزام لگایا گیا ہے کہ پورکیاستھ نے 2019 کے لوک سبھا انتخابات کے دوران انتخابی عمل میں خلل ڈالنے کے لیے ایک گروپ – پیپلز الائنس فار ڈیموکریسی اینڈ سیکولرازم (PADS) کے ساتھ سازش کی۔
ایف آئی آر میں نامزد ملزمان اور اعداد و شمار کے تجزیے میں سامنے آنے والے مبینہ ملزمان کے خلاف 3 اکتوبر کو دہلی کے 88 مقامات اور دیگر ریاستوں میں سات مقامات پر چھاپے مارے گئے۔ نیوز کلک کے دفاتر اور صحافیوں کی رہائش گاہوں سے 300 کے قریب الیکٹرانک گیجٹس بھی قبضے میں لیے گئے جن کی چھان بین کی گئی۔ چھاپے کے بعد دہلی اور این سی آر میں اسپیشل سیل نے نو خواتین صحافیوں سمیت 46 لوگوں سے پوچھ گچھ کی۔