لکھنؤ :(ایجنسی)
یوگی حکومت نے اترپردیش کے تمام مدارس میں قومی ترانہ کو لازمی قرار دے دیا ہے۔ اس کے لیے احکامات جاری کر دیے گئے ہیں۔ یہ حکم تمام تسلیم شدہ، امداد یافتہ اور غیر امداد یافتہ مدارس میں لاگو ہوگا۔ جانکاری کے مطابق اقلیتی بہبود کے تمام افسران کو ایک خط جاری کرتے ہوئے کہا گیا ہے کہ ریاست کے تسلیم شدہ اور امداد یافتہ مدارس میں تعلیمی سیشن کے آغاز میں قومی ترانہ کو لازمی قرار دیا جائے۔
پڑھائی شروع ہونے سے پہلے قومی ترانہ
یوپی مدرسہ ایجوکیشن کونسل کے حکم کے مطابق تمام مدارس میں قومی ترانہ ہوگا۔ صبح کلاس شروع ہونے سے پہلے قومی ترانہ بجایا جائے گا۔ قومی ترانے کے بعد طلباء کلاس میں جائیں گے۔ رمضان المبارک کی تعطیلات کے بعد کھلنے والے تمام مدارس میں قومی ترانہ گایا جائے گا۔
اتر پردیش مدرسہ ایجوکیشن کونسل کے رجسٹرار ایس این پانڈے نے اس سلسلے میں تمام ضلع اقلیتی بہبود افسران کو ایک خط جاری کیا ہے۔ اس خط میں کہا گیا ہے کہ رواں سال 24 مارچ کو ہونے والی کونسل کے اجلاس میں ہر ایک میںتسلیم شدہ امدادی ،غیر امدادی مدارس میں آئندہ تعلیمی سیشن سے کلاسز شروع ہونے سے قبل دیگر دعاؤں کے ساتھ ساتھ اساتذہ اور طلباء کی جانب سے قومی ترانہ گانے کا فیصلہ کیا گیا ہے۔
اس کے ساتھ حکم میں کہا گیا ہے کہ ضلع اقلیتی بہبود کے افسران کو اس حکم کی تعمیل کو یقینی بنانے کے لیے باقاعدگی سے نگرانی کرنی ہوگی۔
مدرسہ بورڈ میں 14 مئی سے امتحانات
رمضان المبارک کی تعطیلات کے بعد آج سے مدارس میں کلاسز کا آغاز ہو گیا ہے۔ 14 مئی سے مدرسہ بورڈ میں بھی امتحانات ہیں۔ مدرسہ بورڈ کے اب 6 پیپر کےامتحان ہوں گے۔ اس میں پہلی سے آٹھویں جماعت کے نصاب میں دینیات کے علاوہ ہندی، انگریزی، ریاضی، سائنس اور سماجی سائنس کے سوالیہ پرچے ہوں گے۔
