نئی دہلی :(ایجنسی)
کانگریس کے رکن پارلیمنٹ اور لوک سبھا میں اپوزیشن لیڈر ادھیر رنجن چودھری نے یوکرین میں ایک ہندوستانی طالب علم کی موت پر غم کا اظہار کیا ہے۔ انہوں نے وزیر اعظم نریندر مودی پر زور دیا ہے کہ وہ انتخابات کے بجائے یوکرین سے ہندوستانی طلباء کو نکالنے پر توجہ دیں۔ ادھیر رنجن چودھری نے ٹویٹ کیا اور لکھا – یوکرین میں ایک ہندوستانی طالب علم کی دل دہلا دینے والی موت سے صدمے اور تکلیف میں ہوں۔ نریندر مودی جی کو انتخابات کے بجائے جنگ زدہ یوکرین سے ہندوستانی طلباء کو نکالنے پر توجہ دینی چاہیے۔
انہوں نے کہا ہے کہ یوکرین میں حالات بد سے بدتر ہوتے جا رہے ہیں۔ پوری قوم ہندوستان کے بے بس طلباء کے ساتھ کھڑی ہے۔ ایشور ان کی حفاظت کرے۔ اس سے کچھ دیر پہلے بھارتی وزارت خارجہ کے ترجمان ارندم باغچی نے ٹویٹ کر کے بتایا تھا کہ یوکرین کے خار کیف میں ایک ہندوستانی طالب علم کی موت ہو گئی ہے۔ انہوں نے ہندوستانیوں کو بحفاظت نکالنے کے ہندوستان کے مطالبے کو دہرایا۔ ہندوستان نے کئی طیاروں کے ذریعے ہندوستانی شہریوں کو یوکرین سے نکالا ہے، لیکن خیال کیا جاتا ہے کہ ہندوستانی شہریوں کی بڑی تعداد اب بھی یوکرین میں ہے۔
