کانگریس اعظم خان کی لڑائی لڑے گی:اجے رائے

لکھنؤ:کانگریس نے بھی لوک سبھا انتخابات کو لے کر اپنا سیاسی داؤ کھیلنا شروع کر دیا ہے۔ اسی سلسلے میں اتر پردیش کانگریس کے صدر اجے رائے آج ایس پی لیڈر اعظم خان سے ملاقات کے لیے سیتا پور ڈسٹرکٹ جیل پہنچے۔ بتایا جا رہا ہے کہ جب وہ سیتا پور ڈسٹرکٹ جیل پہنچے تو اعظم خان نے اجے رائے سے ملنے سے انکار کر دیا۔ کانگریس کے ریاستی صدر کے ساتھ بڑی تعداد میں کانگریس کارکن بھی جیل پہنچے۔ اجے رائے کے اعظم خان سے ملاقات نہ کرنے سے ناراض کانگریسی کارکنوں نے ضلع انتظامیہ، وزیر اعلی یوگی آدتیہ ناتھ اور وزیر اعظم نریندر مودی کے نام پر ‘مردہ آباد’ کے نعرے لگانے شروع کر دیئے۔ ضلع جیل میں کافی دیر تک ہنگامہ ہوا، جس کے بعد اجے رائے انتظامیہ پر دباؤ میں کام کرنے کا الزام لگاتے ہوئے سیتا پور ضلع جیل سے باہر چلے گئے۔ اس کے بعد اجے رائے نے جیل انتظامیہ پر سنگین الزامات لگائے۔ انہوں نے کہا کہ جیل انتظامیہ حکومت کے دباؤ میں کام کر رہی ہے۔ انہیں ملنے نہیں دیا جا رہا ہے۔ اعظم خان سے نہ تو فون پر بات ہوئی اور نہ ہی انہیں تحریری طور پر کچھ دیا گیا کہ اعظم خان ملنا نہیں چاہتے۔ اجے رائے نے کہا کہ بی جے پی اعظم خان، ان کی بیوی اور بیٹے کو ہراساں کر رہی ہے۔ یہ زیادتی درست نہیں۔ وہ ضرور اعظم خان کی جنگ لڑیں گے۔ ہم سب ان کے دکھ میں برابر کے شریک ہیں۔