بھوپال:(ایجنسی)
پڑوسی ریاست اتر پردیش میں مدارس میں قومی ترانہ گانے کو لازمی قرار دینے کے بعد، مدھیہ پردیش کے وزیر داخلہ نروتم مشرا نے کہا کہ ان کی ریاست میں بھی اسی طرح کے اقدام پر غور کیا جا سکتا ہے۔
انہوں نے یہ بیان جمعہ کو دارالحکومت بھوپال میں صحافیوں کے پوچھے گئے ایک سوال کے جواب میں دیا۔
اس کے علاوہ مدھیہ پردیش بی جے پی کے سربراہ وشنو دت شرما نے کہا کہ ملک بھر کے تمام تعلیمی اداروں میں قومی ترانہ پڑھا جانا چاہیے۔
12 مئی سے اتر پردیش کے تمام مدارس میں قومی ترانہ ’جن گنا من‘ گانا لازمی کر دیا گیا ہے۔ 9 مئی کو، اتر پردیش مدرسہ تعلیمی بورڈ کے رجسٹرار نے تمام ضلع اقلیتی بہبود کے افسران کو اس سلسلے میں ایک حکم جاری کیا۔
مدھیہ پردیش کے وزیر داخلہ نروتم مشرا نے صحافیوں سے بات کرتے ہوئے کہا کہ قومی ترانہ ہر جگہ گانا چاہیے۔ انہوں نے کہا، ‘یہ اچھی بات ہے۔ یہ قومی ترانہ ہے اور اسے ہر جگہ گایا جا سکتا ہے۔
یہ پوچھے جانے پر کہ کیا مدھیہ پردیش میں بھی اسی طرح کا فیصلہ لاگو کیا جا سکتا ہے، مشرا نے کہا، ’یہ غور طلب ہے… اس پر غور کیا جا سکتا ہے۔‘
اس پر کہ آیا مدھیہ پردیش کے مدارس میں بھی قومی ترانہ گانا چاہیے، ریاستی بی جے پی صدر وشنو دت شرما نے کہا، ’’ہم کسی کو پاکستان کا قومی ترانہ گانے کے لیے نہیں کہہ رہے ہیں۔ ہم صرف مدھیہ پردیش، اترپردیش اور ملک کے کونے کونے میں واقع تعلیمی اداروں میں قومی ترانہ اور قومی گیت اور ’بھارت ماتا کی جے‘ کے نعرے لگانے کے لیے کہہ رہے ہیں۔
انہوں نے کہا کہ اگر ایسا ہو رہا ہے اور ایسا فیصلہ لیا گیا ہے تو یہ ایک خوش آئند قدم ہے۔
ہندوستان ٹائمز کے مطابق بی جے پی کی جانب سے مہاراشٹر میں بھی ایسی ہی درخواست کی گئی ہے۔ آچاریہ تشار بھوسلے، جو بی جے پی کے روحانی رابطہ اتحاد کے ریاستی صدر ہیں (ان کے ٹویٹر بائیو کے مطابق) نے یوگی حکومت کے اقدام کی ستائش کی اور اس پر عمل کرنے کی ضرورت پر بات کی۔
انہوں نے ٹویٹ کر کے کہا، ‘اتر پردیش کے مدارس میں قومی ترانے کو لازمی قرار دینے کے یوگی حکومت کے فیصلے کا خیر مقدم کرتے ہیں! دینی اور اسکولی تعلیم کے ساتھ جذبہ حب الوطنی کو بیدار کرنے کی ضرورت ہے۔
ایک اور ٹویٹ میں، بھوسلے نے مہاراشٹر میں مہا وکاس اگھاڑی (MVA) کی زیر قیادت حکومت پر زور دیا کہ وہ ریاست کے مدارس میں ’جن گنا من‘ کے پڑھنے کو لازمی بنائے۔
