مشاورت میں پسماندہ غیر پسماندہ کے نام پر مسلمانوں کو تقسیم کرنے کی سازش:ڈاکٹر سید احمد خاں کا سنگین الزام

نئی دہلی: ( آر کے بیورو )یونائیٹڈ مسلم آف انڈیا نے ہندوستانی مسلمانوں کو تقسیم کرنے کی سازش کی شدید الفاظ میں مذمت کرتے ہوئے کہا ہے کہ اسلام میں تمام مسلمان آپس میں بھائی ہیں اور برابر ہیں، انہیں تقسیم کرنے کی کوئی بھی سازش کامیاب نہیں ہوگی۔ واضح رہے یو ایم آئ مشاورت کی ممبر ہے۔۔ مذکورہ تنظیم کے جنرل سیکرٹری مرکزی مسلم مجلس مشاورت کے ممبر، معروف سوشل ایکٹیوسٹ و محب اردو ڈاکٹر سید احمد خان نے اخبارات کو جاری بیان میں کہا کہ مسلمانوں کی وفاقی تنظیم آل انڈیا مسلم مجلس مشاورت میں بھی مسلمانوں کو پسماندہ غیر پسماندہ کے نام پر تقسیم کرنے کی سازش کی جارہی ہے،لگتا ہے کہ وہ بی جے پی کے حق میں آگئی ہے۔ حالانکہ انہیں اپنے عہدوں کا وقار برقرار رکھنا چاہیے۔ ان کے طرز عمل سے مسلمانوں کے درمیان اتحاد اور ہم آہنگی کو برقرار رکھنے کی ہر ممکن کوشش کرنی چاہیے۔ پچھلے ایک سال سے بھارتیہ جنتا پارٹی بھی مسلمانوں کو تقسیم کرنے کی سازش کر رہی ہے لیکن وہ اس میں کامیاب نہیں ہو پا رہی ہے۔ انہوں نے نامہ نگار سے گفتگو کرتے ہوے کہا کہ اس صورتحال سے انہیں بہت تشویش ہے اور مرکزی قیادت سے اس رویہ پر احتجاج درج کراچکے ہیں یہ موقف مشاورت کے اجتماعی احساس کے خلاف ہے۔

ڈاکٹر خان نے آگے کہا کہ اسلام ایک ایسا مذہب ہے جہاں کسی کے ساتھ کسی قسم کی تفریق نہیں، یہاں سب کو برابر سمجھا جاتا ہے۔ ہر مسلمان کو ایک دوسرے کا بھائی کہا جاتا ہے، اسلام میں مسجد کے امام کو ایک اہم مقام حاصل ہے، بلکہ وہ سپریم لیڈر ہے۔ مساجد میں بادشاہ، عہدے، امیر اور غریب امام کے پیچھے صف میں کھڑے ہو کر نماز پڑھتے ہیں۔ کوئی یہ بھی نہیں پوچھتا کہ امام کون ہے؟مسلمان مفتی کفایت اللہ کے پیچھے نماز پڑھ کر سارااختلاف پہلے ہی دفن کر چکے ہیں۔معاشی طور پر پسماندہ غریب مسلمانوں کی ایک بڑی تعداد مساجد میں امام کے طور پر کام کرتی ہے اور ان کے پیچھے امیر، خوش حال اور خوشحال مسلمان بغیر تردد کے نماز پڑھتے ہیں۔
ڈاکٹر خان نے کہا کہ آئین کے آرٹیکل 341 پر 1950 میں لگائی گئی پابندی کو ختم کیا جائے۔ کیونکہ اس کی وجہ سے معاشی طور پر کمزور عیسائیوں اور مسلمانوں کے ساتھ مسلسل ناانصافی ہو رہی ہے۔ تمام مذاہب کے کمزور اور غریب طبقات کے لوگوں کو ریزرویشن کا فائدہ ملنا چاہیے۔ مذہب کی بنیاد پر کسی خاص مذہب کے ماننے والوں کو روکنے کی کوشش نہیں ہونی چاہیے۔ ایسی کوششوں سے امتیازی سلوک کا احساس پیدا ہوتا ہے اور غریب ‘انتہائی غریب’ کے زمرے میں آتے ہیں۔ حکومتوں کا کام معاشرے کے کمزور طبقوں کی معاشی حالت کو بہتر بنانا ہونا چاہیے۔ دفعہ 341 پر پابندی کا جائزہ لینے کے لیے مرکزی حکومت کی طرف سے تشکیل دیا گیا کمیشن ایک تاخیری لیکن خوش آئند قدم ہے۔