دہرادون؛پی ایم کے ‘من کی بات’ نہ سننے پر طلباء پر لگا جرمانہ

دہرادون: دہرادون کے ایک اسکول پر وزیر اعظم نریندر مودی کے ‘من کی بات’ پروگرام کو سننے کے لیے اسکول نہ پہنچنے والے طلبہ سے 100 روپے جرمانہ وصول کرنے کا الزام ہے۔ ایک عہدیدار نے جمعہ کو یہ اطلاع دی۔
اس سلسلے میں اسکول انتظامیہ کی جانب سے اسکول کے واٹس ایپ گروپ میں احکامات جاری کیے گئے.
خبر رساں ایجنسی آئی اے این ایس کے مطابق نیشنل ایسوسی ایشن فار پیرنٹس اینڈ اسٹوڈنٹس رائٹس کے قومی صدر عارف خان نے چیف ایجوکیشن آفیسر، دہرادون کو ایک خط لکھ کر اس معاملے میں کارروائی کا مطالبہ کیا ہے۔محکمہ تعلیم نے اسکول کو نوٹس جاری کرتے ہوئے تین دن میں جواب طلب کرلیا ہے۔
عارف خان نے کہا کہ دہرادون کی جی آر ڈی نرنجن پور اکیڈمی نے اتوار کو من کی بات پروگرام میں شرکت نہ کرنے والے بچوں کو 100 روپے جرمانہ یا میڈیکل سرٹیفکیٹ جمع کرانے کا حکم جاری کیا
آئی اے این ایس نے مزید بتایا کہ چیف ایجوکیشن آفیسر پردیپ کمار نے کہا، "اسکول کو وجہ بتاؤ نوٹس جاری کیا گیا ہے۔ اور اگر اسکول تین دن کے اندر اپنا موقف پیش نہیں کرتا ہے تو سمجھا جائے گا کہ اسکول کی جانب سے طلبہ سے پیسے مانگے گئے تھے۔ اس کے بعد محکمہ کارروائی کرے گا۔
وزیر اعظم نریندر مودی کے ماہانہ ریڈیو شو ‘من کی بات’ نے 30 اپریل کو 100 ایپی سوڈ مکمل کر لیے ہیں۔
100ویں قسط کی وجہ سے ملک بھر میں اسکولوں سمیت کئی مقامات پر خصوصی پروگرام منعقد کیے گئے۔ ،