سہارنپور :(پریس ریلیز)
شہر سہارنپور سے متصل موضع پنجورہ کی جامع مسجد میں فیض العلوم خانقاہ بوڑیہ کے مفتی محمد ناصرایوب ندوی نے دینی دورہ کے دوران یہاں نمازِ جمعہ سے قبل اپنے خطاب میں کہا کہ موجودہ حالات سے مایوس ہونے کی قطعاً ضرورت نہیں ہے بلکہ اللہ و رسول کے احکامات پر عمل کرنا اہم تقاضہ ہے اور یہی اصل دین ہے اور یہ اللہ کی سنت رہی ہے کہ ایمان والوں پر حالات تو آئیں گے اس لئے نہیں کہ مایوسی کا ماحول پیدا ہوجائے نہیں بلکہ اس لئے آتے ہیں تاکہ ایمان خوب مضبوط ہوجائے یقیناً اللہ کی رحمت مدد ونصرت شامل حال ہوگی۔
انہوں نے بات جاری رکھے ہوئے کہا کہ مساجد کو آباد کرنے والوں کے لئے قرآن مقدس میں ایک جگہ پانچ صفات بیان کی گئی ہیں ایک یہ کہ اللہ پر ایمان لانا دوسری صفت آخرت کے دن پر ایمان لانا،تیسرے نماز قائم کرنا،چوتھے زکوٰۃ اداکرنا،اور پانچویں یہ کہ صرف اللہ سے ڈرنا،یہ وہ صفات عالیہ ہیں جو دنیا و آخرت میں کامیابی کی ضامن ہیں اس لئے مساجد کو مساجد کے اعمال سے آباد کرنا ا ہم تقاضہ ہے،مساجد کے ممبر ومحراب سے اتحاد و اتفاق اور خوشگوار ماحول کی دعوت دی جائے۔
انہوں نے رئیس فیض العلوم خانقاہ بوڑیہ رہبر ملت حضرت پیرجی حسین احمد کنوینر اصلاح معاشرہ کمیٹی آل انڈیا مسلم پرسنل لا بورڈ کا پیغام پیش کرتے ہوئے کہا کہ معاشرہ کی اصلاح کے لئے فرد کی اصلاح ضروری ہے انہوں نے کہا کہ معاشرہ کی اصلاح کی ذمہ داری ہم میں سے ہر ایک کی ہے نیز انہوں نے کہا کہ موجودہ حالات میں جہاں ہم دیگر چیزیں پڑھ رہے ہوں وہیں ہم سب چھوٹے بڑے،مرد وعورت،بچے بوڑھے سب عشاء کی نماز کے بعد چاہے انفرادی طور پر یا اجتماعی طور پر 511 بار اللہ اکبر پڑھنے کا اہتمام ہو اول آخر طاق عدد میں درود شریف پڑھ لی جائے اور آخر میں خیر و عافیت کے لئے دعاء کی جائے تو خوشحالی عام ہوگی اور پریشانیاں دور ہوں گی۔
