اویسی کے دم خم؛بہار میں لوک سبھا کی سولہ سیٹوں پر لڑیں گے

پٹنہ: اپنی آبائی ریاست آندھرا ہردیش میں صرف ایک پارلیمانی سیٹ پر لڑنے والی اے آئی ایم آئی ایم نے  اعلان کیا کہ اس نے بہار کی 16 لوک سبھا سیٹوں پر الیکشن لڑنے کا فیصلہ کیا ہے۔
خبررساں ایجنسی آئی اے این ایس کے مطابق ریاستی صدر اختر الامام نے کہا کہ پارٹی امیدوار دربھنگہ، پاٹلی پترا، کشن گنج، مدھوبنی، کٹیہار، مظفر پور، گوپال گنج، شیوہر، پورنیہ، ارریہ، سیتامڑھی، کراکت، مہاراج گنج، سمستی پور، پسم چمپارن اور والمیکی نگر سیٹوں سے الیکشن لڑیں گے۔
"ہماری پارٹی انڈیا بلاک کا حصہ بننا چاہتی تھی لیکن انہوں نے ہمیں نظر انداز کر دیا۔ ہم بی جے پی کے خلاف اکیلے ہی لڑیں گے۔‘‘
’’مسلم کمیونٹی سماج کے ہر طبقے سے پیچھے ہے۔ بہار کے ذات پات کے سروے میں بھی مسلم لوگوں کی پسماندگی ظاہر ہوئی۔ پھر بھی، کوئی بھی سیاسی پارٹی بہار اور ملک میں مسلم لیڈروں کی تشہیر نہیں کر رہی ہے،‘‘ امام نے کہا۔
انہوں نے یہ بھی کہا کہ اے آئی ایم آئی ایم محمد شہاب الدین کی بیوہ حنا شہاب کی حمایت کرے گی اگر وہ سیوان سے لوک سبھا الیکشن لڑتی ہیں۔
اے آئی ایم آئی ایم کا اعلان انڈیا  بلاک، خاص طور پر آر جے ڈی کے لیے خطرے کی گھنٹی کے طور پر آیا ہے کیونکہ یہ اس کے ایم وائی (مسلم- یادو) صف بندی کو متاثر کر سکتا ہے۔ 2020 کے اسمبلی انتخابات کے دوران، اے آئی ایم آئی ایم نے بہار میں 5 سیٹوں پر کامیابی حاصل کی لیکن 20 سے زیادہ سیٹوں پر آر جے ڈی اور کانگریس کو مارا۔