شاہین باغ کے فرنیچر مارکیٹ میں افرا تفری،لوگ خود سامان ہٹانے لگے

نئی دہلی :(ایجنسی)

جنوبی دہلی میں تجاوزات ہٹائے جانے کی خبروں کے درمیان شاہین باغ کے فرنیچر مارکیٹ میں افرا تفری کا ماحول دیکھنے کو مل رہا ہے۔ فرنیچر بازار میں موجود کئی دکانوں کے مالکان خود ایسے سامان ہٹواتے ہوئے دیکھے جا رہے ہیں جو کہ سڑکوں پر پھیلے ہوئے تھے۔ عموماً یہ سامان دکانوں کے سامنے سڑک پر ہی رکھے ہوئے نظر آتے تھے۔ آج صبح جب ایس ڈی ایم سی نے بتایا کہ جسولہ علاقے میں تجاوزات ہٹانے کی معمول کی کارروائی ہونی ہے، تو شاہین باغ کے فرنیچر مارکیٹ کے دکاندار بھی سرگرم ہو گئے۔ چونکہ شاہین باغ جسولہ کے قریب ہے، اس لیے انھیں خوف ہے کہ کہیں اچانک افسران ان کی دکانوں کی طرف رخ نہ کر لیں۔

اس درمیان ایس ڈی ایم سی کی کارروائی فی الحال ہوتی ہوئی دکھائی نہیں دے رہی ہے کیونکہ سریتا وِہار کے ایس ایچ او راکیش کمار نے ایس ڈی ایم سی کو خط لکھ کر بتایا ہے کہ دہلی پولیس کے جوانوں کی پہلے سے ہی دوسری جگہوں پر تعیناتی ہے۔ اس وجہ سے وہ تجاوزات ہٹانے والی کارروائی کے لیے آج سیکورٹی فورس کی اضافی تعیناتی سریتا وِہار میں نہیں کر پائیں گے۔ یہ بھی کہا گیا ہے کہ ایسی تجاوزات ہٹاؤ مہم کے لیے ایس ڈی ایم سی کو کم از کم 10 دن پہلے جانکاری دے تو بہتر ہوگا۔

واضح رہے کہ ایس ڈی ایم سی نے آج تجاوزات ہٹاؤ مہم چلانے کی جانکاری دی اور بتایا کہ اس میں ایس ڈی ایم سی کے افسران شامل ہوں گے۔ یہ بھی بتایا گیا کہ سڑکوں پر غیر قانونی پارکنگ اور غیر قانونی ریہڑی پٹری والوں پر یہ کارروائی ہوگی۔ کہا گیا تھا کہ ایس ڈی ایم سی کے میئر اس کارروائی کے دوران وہاں موجود نہیں رہیں گے اور وہاں کوئی توڑ پھوڑ یا کوئی اسپیشل مہم نہیں چلائی جائے گی۔ ایس ڈی ایم سی کو یہ صفائی اس لیے دینی پڑی تھی کیونکہ جنوبی دہلی میونسپل کارپوریشن کے میئر مکیش سورین نے کہا تھا کہ جہانگیر پوری کے بعد اب جنوبی دہلی کے علاقوں میں بلڈوزر چلے گا۔ اس میں انھوں نے کہا تھا کہ شاہین باغ میں سرکاری جگہوں پر تجاوزات ہے۔ اس کے علاوہ سریتا وِہار، کالندی کنج میں لوگوں نے کالونی کاٹ کر غیر قانونی قبضہ کیا ہوا ہے۔

دوسری جانب جنوبی دہلی میونسپل کارپوریش کے کمشنر آج سریتا وہار، جیت پور اور مدن پور کھادر کے علاقوں میں ان غیر قانونی بلڈنگوں کا سروے کریں گے جن پر کارپوریشن نے نوٹس چسپاں کئے ہوئے ہیں۔ اس قدم کو لے کر علاقہ کے لوگوں میں زبردست خوف ہے۔

جنوبی دہلی میونسپل کارپوریشن کے میئر مکیش سورین کے مطابق کارپوریشن نے غیر قانونی تجاوذات کے خلاف پوری مہم چلانے کی تیاری کی ہوئی ہے۔ اس تعلق سے افسران کو مطلع کر دیا گیا ہے۔سریتا وہار، مدن پور کھادر اور جیت پور کے کونسلروں کو مطلع کر دیا گیا ہے۔ واضح رہے کملیش کمار شکلا جیت پور، نیتو سریتا وہار اور سنتوش دیوی مدن پور کھادر سے کونسلر ہیں۔ کونسلروں سے جنوبی دہلی میونسپل کارپوریشن کے میئر اور کمشنر کی سروے میں مدد کے لئے کہا گیا ہے۔

میئر نے کہا کہ ان کے پاس غیر قانونی تجاوزات کو ہٹانے کے لئے پورا منصوبہ ہے اور اس تعلق سے تمام افسران اور پولیس کو مطلع کر دیا گیا ہے۔ انہوں نے بتایا کہ ناجائز تجاوزات کے لئے کسی نوٹس کی ضرورت نہیں ہوتی، لیکن غیر قانون طور پر تعمیر کی گئی بلڈنگوں کو نوٹس دیا دیا جاتا ہے اور وہ دیا جا چکا ہے۔

کانگریس کے کونسلر ابھیشیک دت نے جنوبی دہلی میونسپل کارپوریشن کی انہدامی مہم کے تعلق سے سوال کیا کہ یہ انہدامی کارروائی پوری دہلی کے لئے ہے یا یہ صرف اس علا قہ کے لئے ہے۔ انہوں نے امید ظاہر کی ہے کہ یہ مہم غریبوں کے خلاف نہیں ہو گی، بلکہ سینک فارم میں بھی چلے گی، جہاں غیر قانونی طور پر فارم ہاؤس تعمیر کئے گئے ہیں۔ انہوں نے کہا کہ میئر کو غریبوں کو اپنا نشانہ نہیں بنانا چاہئے۔

بی جے پی ان غیر قانونی تعمیرات کے لئے عام آدمی پارٹی کو ذمہ دار مانتی ہے، جبکہ کانگریس کے سینئر رہنما اور سابق وزیر اجے ماکن کا کہنا ہے کہ یہ کارروائی صرف مہنگائی اور بے روزگاری جیسے بنیادی مدوں سے توجہ ہٹانے کے لئے ہے۔ انہوں نے کہا کہ غریب کی تجاوزات ضرورت کی بنیاد پر ہوتی ہیں، جبکہ امیر کی تجاوذات کی بنیاد لالچ ہوتی ہے، اس لئے حکومت کو کسی بھی کارروائی سے پہلے اس پہلو کو ذہن میں رکھنا چاہئے۔