قادر کے منھ میں ہڑدنگیوں نے رنگ ڈال دیا ،روزہ ٹوٹ گیا ،پولیس نے ایف آئی آر درج نہیں کی

مہاراشٹر کے تھانے میں ہولی کے دن روزہ رکھنے والے ایک مسلمان نوجوان کے ساتھ بدتمیزی کی گئی جس کی وجہ سے اس کا روزہ ٹوٹ گیا۔ تھانے کے ممبرا میں محمد قادر نامی نوجوان نے بہت منت سماجت کی اور بتایا کہ وہ روزے سے ہے لیکن پھر بھی لوگ نہ مانے اور اس کے منہ میں رنگ ڈال دیا۔ جس کی وجہ سے اس کا روزہ ٹوٹ گیا۔ پورے معاملے میں شکایت دیتے ہوئے محمد قادر نے پولیس سے ایف آئی آر درج کرنے کا مطالبہ کیا ہے ۔ متاثرہ محمد قادر نے اس معاملے میں تھانے کے ممبرا پولیس اسٹیشن میں شکایت درج کرائی، جس کے بعد ممبئی پولیس نے فی الحال نامعلوم ملزمان کے خلاف این سی درج کی ہے.
ٹی وی 9بھارت ورش کے مطابق محمد قادر مہاراشٹر کے تھانے میں کلوا علاقے سے گزر رہے تھے۔ وہ ایک مسافر کو اسٹیشن پر اتارنے جا رہے تھے کہ کچھ لوگوں نے اسے زبردستی رنگ لگایا اور پھر منہ میں رنگ ڈالا جس سے اس کا روزہ ٹوٹ گیا۔ اس پورے واقعہ میں 4-5 لوگ ملوث تھے۔ قادر ممبرا کا رہنے والا ہے۔ اس نے کلوا کے ڈی مارٹ سے اپنے آٹو میں ایک خاتون مسافر کو بٹھایا  تھا اور جب وہ کلوا کے کھاریگاؤں علاقے سے جانے لگا تو کچھ نامعلوم افراد نے محمد قادر کو پکڑ لیا۔ زبردستی اس پر رنگ ڈال دیا۔  قادر کہتا رہا کہ میں روزے سے ہوں مجھے جانے دیا جائے لیکن  ہڑدنگا  سننے کو تیار نہیں تھے۔
اسی دوران پیچھے بیٹھی خاتون مسافر ڈر گئی اور رونے لگی۔ اسے روتا دیکھ کر رنگ لگانے والے ڈر گئے اور وہاں سے بھاگ گئے۔ تاہم جانے سے پہلے قادر کے منہ میں رنگ ڈالا جس سے اس کا روزہ ٹوٹ گیا۔