عمر خالد کی درخواست ضمانت پر سماعت چار ہفتوں کے لئے ملتوی،یہ ہے وجہ

نئی دہلی فساد 2020کی سازش میں مبینہ طور پر جے این یو کے سابق طالب علم عمر خالد ملوث ہونے کے سلسلے میں یو اے پی اے کے تحت درج مقدمے میں سپریم کورٹ نے ضمانت کی درخواست پر سماعت چار ہفتوں کے لیے ملتوی کر دی۔
جسٹس انیرودھا بوس اور بیلا ایم ترویدی کی بنچ نے خالد کی طرف سے پیش ہونے والے سینئر وکیل کے سبل سے کہا کہ اس معاملے کی تفصیلی سماعت کی ضرورت ہے۔اس معاملے میں، ہمیں دستاویز بہ دستاویز جانا پڑے گا۔واضح ہو کہ سپریم کورٹ کے جج جسٹس پرشانت کمار مشرا نے 9 اگست کو خالد کی عرضی کی سماعت سے خود کو الگ کر لیا تھا۔
اس سے پہلے دہلی ہائی کورٹ کے 18 اکتوبر 2022 کے حکم کو چیلنج کرنے والی خالد کی درخواست جسٹس اے ایس بوپنا اور پرشانت کمار مشرا کی بنچ کے سامنے سماعت کے لیے آئی تھی۔دہلی ہائی کورٹ نے خالد کی ضمانت کی درخواست یہ کہتے ہوئے مسترد کر دی تھی کہ وہ دوسرے شریک ملزمان کے ساتھ مسلسل رابطے میں تھا اور ان کے خلاف الزامات پہلی نظر میں درست ہیں۔
یہ چھٹا موقع ہے جب سپریم کورٹ میں عمر خالد کی درخواست ضمانت پر سماعت ملتوی ہوئی ہے،اس سے پہلے پانچ بارسماعت ملتوی ہو چکی ہے۔ ان میں سے دو بار عمر خالد کی درخواست پر، دو بار عدالت کی طرف سے اور ایک بار جج کی جانب سے سماعت سے دستبردار ہونے کی وجہ سے سماعت ملتوی ہو چکی ہے۔