ہلدوانی میں زبردست کشیدگی،کرفیو جاری،انٹرنیٹ بند،اب تک  دو افراد ہلاک ،انتظامیہ کا سخت کارروائی کا اعلان

لکھنؤ: اتراکھنڈ کے ہلدوانی میں  مدرسہ اور مسجد کو منہدم کئے جانے کے خلاف بھڑکے تشدد کی آنچ  یوپی تک  محسوس کی جارہی ہے ۔انتظامیہ کو خدشہ ہے کہ نماز جمعہ کے بعد مظاہرے ہوسکتے ہیں حالانکہ ایسا کوئی باظابطہ اعلان نہیں کیا گیا ہے  پھر بھی پولیس کو مستعد رہنے کا حکم دیا گیا ہے۔  متعدد شہروں میں حفاظت کے سخت انتظامات کئے گئے ہیں۔ جبکہ بریلی میں کئی راستوں کے رخ تبدیل کر گئے
بریلی میں اتحاد ملت کونسل کے سربراہ مولانا توقیر رضا خان کے احتجاج کے پیش نظر سخت احتیاط برتنے کی ہدایت دی گئی ہے۔ اس کے علاوہ متعدد راستوں کے رخ تبدیل کئے گئے ہیں۔ پولیس ہیڈکوارٹر سے الرٹ جاری کیا گیا ہے۔ بریلی شہر کے باشندگان سے اپیل کی گئی ہے کہ وہ بہت ضروری ہونے پر ہی گھر سے باہر نکلیں۔ یوپی کے کئی اضلاع کی اہم مساجد پر نماز کے وقت چوکسی رکھنے کی ہدایت جاری کی گئی ہے۔
ڈی جی پی نے اپنے ماتحت افسران اور پولیس اہلکاروں سے اضافی چوکسی برتنے کی ہدایت دی ہے۔ تمام اضلاع کو زیادہ محتاط رہنے کو کہا گیا ہے۔ اتراکھنڈ سے متصل اضلاع میں چوکسی بڑھا دی گئی۔ یوپی پولیس سوشل میڈیا پر بھی کڑی نظر رکھے ہوئے ہیں اور جذبات بھڑکانے والی، فرضی اور گمراہ کن پوسٹ پر کارروائی کی جا سکتی ہے۔
دریں اثناضلع مجسٹریٹ نینی تال وندنا سنگھ کے مطابق اس واقعے میں اب تک 2 لوگوں کی موت کی موت کی تصدیق ہوئی ہے اور 100 سے زیادہ افراد زخمی ہوئے ہیں۔ زخمیوں کا اسپتال میں علاج جاری ہے۔ علاقے میں جگہ جگہ پولیس کی نفری موجود ہے۔ انٹرنیٹ سروس بند کر دی گئی۔ نینی تال ضلع انتظامیہ نے تمام اسکول اور کالج بند رکھنے کا حکم دیا ہے۔ لوگوں کو گھروں کے اندر رہنے کی ہدایت کی گئی ہے۔