حزب اللہ کے راکٹ حملوں سے  اسرائیل میں سیکڑوں  گھر تباہ،عوام میں خوف و دہشت

مشرق وسطیٰ میں اس وقت کشیدگی اپنے عروج پر ہے۔ امریکہ کی طرف سے جنگ بندی کی تمام کوششوں کے درمیان اسرائیل کئی محاذوں پر جنگ لڑ رہا ہے۔ ایک طرف غزہ میں حماس کے ساتھ اور دوسری طرف لبنان میں حزب اللہ کے ساتھ مسلسل جنگ جاری ہے۔ تازہ ترین پیش رفت میں، حزب اللہ نے بدھ کے روز اسرائیل پر بڑے پیمانے پر حملے شروع کر دیے۔ اسرائیل کی جانب 50 سے زائد راکٹ فائر کیے گئے جس میں ہزاروں مکانات تباہ ہو گئے۔ سائرن کی آوازوں کے درمیان لوگ خوفزدہ ہیں۔
حزب اللہ نے اسرائیل کے دو بڑےشہروں کتزرین اور گولان ہائٹس میں شہری آبادیوں کے قریب راکٹ حملے کیے ہیں۔ آئی ڈی ایف کا کہنا ہے کہ اس حملے میں ہزاروں خاندانوں اور شہریوں کو نشانہ بنایا گیا ہے۔ گرمیوں کی چھٹیاں گزارنے کے لیے ان شہروں میں آنے والے افراد کو نشانہ بنایا گیا ہے۔ قبل ازیں منگل کو اسرائیل نے جنوبی لبنان کے بندرگاہی شہر سیڈون میں زبردست حملہ کیا تھا جس میں ایک شخص ہلاک ہو گیا تھا۔
اس کے علاوہ لبنان کی وادی بیکا میں حزب اللہ کے ہتھیاروں کے ذخیرہ کرنے کی تنصیبات پر  رات بمباری کی گئی۔ اسرائیل نے جنوبی لبنان میں حزب اللہ کے جنگجوؤں اور راکٹ لانچنگ سائٹس پر باقاعدگی سے بمباری کی ہے۔ لبنان میں گزشتہ اکتوبر سے شروع ہونے والی لڑائی میں اب تک 600 سے زائد افراد ہلاک ہو چکے ہیں، جن میں حزب اللہ کے 400 سے زائد جنگجو اور 132 عام شہری شامل ہیں۔ غزہ میں حماس کے خلاف جنگ شروع ہونے کے بعد حزب اللہ بھی حملے کر رہی ہے۔
حماس کا کہنا ہے کہ امریکا اسرائیل کے دباؤ میں کام کر رہا ہے۔ اسرائیل نے اس تجویز میں نئی شرائط شامل کی ہیں، جو ہمارے لیے قابل قبول نہیں۔ دراصل حماس صدر بائیڈن کی جانب سے مئی میں پیش کی گئی تجویز پر بات کرنا چاہتی ہے۔
حماس کے ایک عہدیدار اسامہ حمدان نے کہا کہ "اس میں کوئی شک نہیں کہ دوحہ میں ہونے والی ملاقات کے بعد امید پیدا کرنے کی کوشش کی جا رہی ہے، لیکن مجھے نہیں لگتا کہ یہ سنجیدہ ہے، بلکہ  معاملہ اس کے بالکل برعکس ہے۔”(ان پٹ آج تک )