،مسلمانوں کے بائیکاٹ،معاملہ میں پنچایتوں کو نوٹس دینے والے افسر عمران رضا کا تبادلہ

چنڈی گڑھ: ہریانہ حکومت نے ہفتہ 19 اگست کو 16 آئی اے ایس افسران کا تبادلہ کیا ہے۔ سات اضلاع کے ڈپٹی کمشنر اور کچھ اضلاع کے میونسپل کمشنر اس ردوبدل میں شامل ہیں۔ ٹرانسفر کیے گئے اہلکاروں میں ریواڑی کے ڈپٹی کمشنر (ڈی سی) محمد عمران رضا بھی شامل ہیں، جنہوں نے حال ہی میں ریواڑی کے مختلف سرپنچوں اور پنچایت ممبران کو کچھ دیہاتوں میں مسلمانوں کے داخلے پر پابندی کی قرارداد پاس کرنے کے لیے وجہ بتاؤ نوٹس جاری کیے تھے۔ دی کوئنٹ کے مطابق عمران رضا نے اپریل میں ریواڑی کے ڈی سی کا عہدہ سنبھالا تھا۔ اب ان کا تبادلہ جنڈ کے ڈپٹی کمشنر کے عہدے پر کر دیا گیا –
ریاستی حکومت نے کہا کہ یہ آئی اے ایس اور ہریانہ سول سروسز (ایچ سی ایس) افسران کی "معمول کی ٹرانسفر/ پوسٹنگ” ہے۔ ہریانہ کے چیف سکریٹری سنجیو کوشل نے 19 اگست بروز ہفتہ تبادلے کے احکامات جاری کیے ہیں۔
دی کوئنٹ نے آگے کہا کہ عمران رضا کے علاوہ، سشیل سروان کو پنچکولہ کے ڈی سی اور پنچکولہ میں شری ماتا منسا دیوی شرائن بورڈ کے چیف ایڈمنسٹریٹر کے طور پر تعینات کیا گیا ہے۔ منوج کمار کو ڈی سی، یمنا نگر تعینات کیا گیا ہے۔ ڈی سی چرخی دادری سے مندیپ کور؛ منوج کمار بطور ڈی سی سونی پت، راہول ہوڈا ڈی سی ریواڑی۔ اور پرشانت پنوار کو ڈی سی، فتح آباد مقرر کیا گیا ہے۔
سنجے جون کو ہریانہ اسٹیٹ کوآپریٹو شوگر ملز یونین کا منیجنگ ڈائریکٹر اور سینک اور ارد سینک ویلفیئر ہریانہ کا ڈائریکٹر جنرل مقرر کیا گیا ہے۔
مونا سرینواس کو فرید آباد میونسپل کارپوریشن کا کمشنر مقرر کیا گیا ہے۔ وہ ایڈیشنل ریزیڈنٹ کمشنر، ہریانہ بھون، نئی دہلی کا چارج برقرار رکھیں گی۔رپودمن سنگھ ڈھلون کو ڈائرکٹر، ایلیمنٹری ایجوکیشن، ہریانہ اور خصوصی سکریٹری، اسکول ایجوکیشن ڈپارٹمنٹ، حکومت ہریانہ مقرر کیا گیا ہے۔ وہ ہریانہ اسٹیٹ شیڈول کاسٹ کمیشن کے سکریٹری کا چارج برقرار رکھیں گے۔