نی دہلی( ایجنسی )سرکاری ذرائع نے بتایا کہ ہندوستان خوش ہے کہ پاکستان اپنی معیشت کے بارے میں مثبت سوچ رہا ہے لیکن دونوں ممالک کے درمیان تجارت ممکن نہیں ہے کیونکہ اسلام آباد سرحد پار دہشت گردی کو فروغ دیتا رہتا ہے۔ یہ ردعمل پاکستان کے وزیر خزانہ مفتاح اسماعیل کے کہنے کے فوراً بعد سامنے آیا کہ ان کی حکومت حالیہ تباہ کن سیلاب کی وجہ سے سخت ترین حالات کی شکار ہے، پورے ملک میں معیشت کو خطرہ لاحق ہے۔ مفتاح اسماعیل کا کہنا ہے کہ ملک بھر میں فصلوں کی تباہی کے بعد لوگوں کی سہولت کے لیے پاکستان، ہندوستان سے سبزیاں اور دیگر خوردنی اشیاء درآمد کرنے پر غور کر سکتا ہے۔
پاکستان نے اگست 2019 میں جموں و کشمیر کو خصوصی حیثیت دینے والے آئین کے دفعہ 370 کو ختم کرنے کے نریندر مودی حکومت کے فیصلے کے بعد ہندوستان کے ساتھ تجارتی تعلقات منقطع کر دیے تھے۔ سرکاری ذرائع نے سی این این نیوز 18 کو بتایا کہ ہمارے پاس پاکستان سے تقریباً 50 غیر ملکی دہشت گردوں کے ہندوستان میں موجود ہونے کی اطلاعات ہیں اور بہت سے سرحد کے قریب بیٹھے ہیں۔ ہم تجارتی مذاکرات کے لیے تیار ہیں لیکن پاکستان کو فوری طور پر کارروائی کرنے اور دہشت گردی کو روکنے کی ضرورت ہے
