اسرائیل غزہ میں حماس سے جنگ ہار چکا ہے، سابق جنرل یٹزہک برک

سابق اسرائیلی فوجی کمانڈر یٹزہک برک نے کہا ہے کہ اسرائیل غزہ میں حماس سے جنگ ہار چکا ہے۔ 
اسرائیلی اخبار کو انٹرویو دیتے ہوئے سابق اسرائیلی فوجی کمانڈر جنرل یٹزہک برک نے مزید کہا کہ اسرائیل علاقائی جنگ کےلیے تیار نہیں۔  جنرل یٹزہک برک نے کہا کہ غزہ اور لبنان میں جو کچھ ہو رہا ہے وہ جلد یا بدیر آ کر ہمارے منہ پر پڑے گا۔
دوسری طرف اسرائیلی وزیراعظم نیتن یاہو نے کہا ہے کہ عالمی دباؤ حماس کے خلاف جنگ میں ہمیں مقاصد حاصل کرنے سے نہیں روک سکتا۔ اسرائیلی کابینہ سے خطاب کرتے ہوئے نیتن یاہو نے کہا کہ ہمارے دوستوں کی یادداشت کمزور ہے جو وہ اتنی جلدی7 اکتوبر کا ہولناک حملہ بھول گئے۔ نیتن یاہو نے کہا کہ 7 اکتوبر کو ہولو کاسٹ کے بعد سے یہودیوں کے خلاف بدترین حملہ ہوا تھا۔ 
اسرائیلی وزیراعظم کا کہنا تھا کہ ہمارے دوستوں نے بہت جلد ہمارے حقِ دفاع سے انکار کر دیا۔ ان کا کہنا تھا کہ اسرائیل رفح میں آپریشن کرے گا، جنگ کے علاقوں سے فلسطینیوں کا انخلا کروائیں گے۔
وہیں غزہ میں اسرائیلی فوج کے حملے جاری ہیں جہاں گزشتہ 24 گھنٹوں میں مزید 60 سے زائد فلسطینی شہید جبکہ 112 زخمی ہوگئے۔ 
عرب میڈیا کا کہنا ہے کہ نصیرات کیمپ پر اسرائیلی بمباری سے 43 فلسطینی شہید ہوگئے، شہدا میں بیشتر بچے ہیں۔فلسطینی وزارت صحت کے مطابق 7 اکتوبر سے اب تک فلسطینی شہدا کی تعداد 31 ہزار 550 سے زائد ہوگئی۔