اسرائیل کی اسپتال پر بمباری،سیکڑوں فلسطینی شہید،دنیا بھر میں مذمت ،بائیڈن سے عرب سربراہوں کی میٹنگ منسوخ

غزہ کی وزارت صحت نے بتایا ہے کہ اسرائیل کی جانب سے الاہلی عرب ہسپتال کے احاطے میں بمباری کے نتیجے میں 500 سے زائد افراد شہید ہو گئے ہیں۔۔ہسپتال پر حملے کے بعد منظر عام پر آنے والی تصاویر میں بڑے پیمانے پر آگ، تباہی اور زمین پر بکھرے انسانی اعضاء نظر آرہے ہیں۔
فلسطینی اتھارٹی کے سربراہ محمود عباس نے حملے پر تین روزہ سوگ منانے کا اعلان کیا۔اسرائیل کی جانب سے غزہ پر فضائی حملوں کے نتیجے میں 7 اکتوبر سے اب تک تین ہزار سے زائد فلسطینی شہید ہو چکے ہیں۔
سعودی عرب نے غزہ میں ہسپتال ’’ الاھلی المعمدانی‘‘ پر اسرائیلی قابض فوج کی بمباری کو گھناؤنا جرم قرار دیا۔ سعودی عرب کے علاوہ ترکیہ، عمان، قطر اور مصر اور دیگر ملکوں نے بھی اس انسانیت سوز حملے کی شدید الفاظ میں مذمت کی ہے۔ اسرائیلی فوج نے حملہ کرکے خواتین اور بچوں سمیت سینکڑوں نہتے فلسطینیوں کو خون میں نہلا دیا ہے
خلیجی ریاستوں نے اس بمباری کی شدید مذمت کی۔ متحدہ عرب امارات اور روس نے ہسپتال پر بمباری کے بعد اقوام متحدہ کی سلامتی کونسل کا ہنگامی اجلاس طلب کرلیا۔
دریں اثنا اس حملے نے اسرائیل کے اپنے دفاع کے حق کی حمایت حاصل کرنے کی امریکی سفارتی کوششوں کو پٹڑی سے اتار دیا ہے۔ اردن کے شہر عمان میں امریکی صدر جو بائیڈن کے ساتھ عرب رہنماؤں کی سربراہی ملاقات منسوخ کر دی گئی ہے۔
اردن کے وزیر خارجہ ایمن صفادی نے اعلان کیا ہے کہ بدھ کو عمان میں اردن کے شاہ عبداللہ، مصری صدر عبدالفتاح السیسی اور فلسطینی صدر محمود عباس کی امریکی صدر بائیڈن کے ساتھ ہونے والی سربراہی ملاقات منسوخ کر دی گئی ہے۔
واضح ہو بائیڈن اسرائیل کی حمایت اور یکجہتی کے اظہار کے لیے آج تل ابیب پہنچ رہے ہیں۔