ہنیہ کو نشانہ بنانے کیلئے اسرائیلی جاسوسی سافٹ ویئر استعمال کیا گیا، یورپی مبصر

یورپی مبصر برائے مشرق وسطی ایلیاجے میگنیئر نے کہا ہے کہ اسماعیل ہنیہ کو نشانہ بنانے کے لیے اسرائیل کا جاسوسی سافٹ ویئر استعمال کیا گیا۔
ایک بیان میں یورپی مبصر کا کہنا تھا کہ اسرائیل نے اسماعیل ہنیہ کو واٹس ایپ پیغام میں جدید ترین اسپائی ویئر لگائے۔
اسپائی سافٹ ویئر نے اسرائیلی انٹیلی جنس کو اسماعیل ہنیہ کی لوکیشن بتائی۔
ایلیاجے میگنیئر کا کہنا تھا کہ اسماعیل ہانیہ کو اپنے بیٹے کے ساتھ ہونے والی کال کے بعد قتل کیا گیا۔
یورپی مبصر نے مزید کہا کہ کال کے دوران اسماعیل ہنیہ کے مقام کی نشاندہی کی گئی۔
مشرق وسطیٰ کی حالیہ کشیدہ صورتحال پر اقوام متحدہ کی سلامتی کونسل کا ہنگامی اجلاس ہوا جس میں چین، روس، الجزائر نے حماس سربراہ اسماعیل ہنیہ کے قتل کی مذمت کی۔
حماس رہنما اسماعیل ہنیہ کی شہادت کے بعد ایران کی درخواست پر سلامتی کونسل کا ہنگامی اجلاس بُلایا گیا۔  اجلاس میں مشرق وسطیٰ کشیدگی روکنے کے لیے سفارتی کوششیں تیز کرنے پر زور دیا گیا۔
ایرانی سفیر عامر سعید نے کہا کہ تہران نے ہمیشہ تحمل کا مظاہرہ کیا لیکن جواب دینے کا حق رکھتا ہے، سلامتی کونسل اسرائیلی حملے کی مذمت اور اس پر پابندیاں عائد کرے۔اس پر نائب اسرائیلی سفیر جوناتھن ملر نے کہا کہ سلامتی کونسل علاقائی دہشتگردی کی حمایت پر ایران پر پابندیاں لگائے، اسرائیل اپنا دفاع کرے گا، نقصان پہنچانے والوں کو طاقت کے ساتھ جواب دیں گے۔
اس موقع پر چین کے سفیر  فُو کونگ نے کہا کہ غزہ جنگ بندی میں ناکامی خطے میں کشیدگی کا سبب ہے۔سلامتی کونسل میں برطانوی سفیر باربرا ووڈورڈ نے کہا کہ اسرائیل اور فلسطین کو امن کے لیے دوبارہ کوششیں کرنی چاہئیں۔
امریکی نائب سفیر روبرٹر ووڈ کا کہنا تھا کہ اثر رسوخ والے ملک کشیدگی میں کمی کے لیے ایران پر دباؤ ڈالیں جبکہ نائب نائب جاپانی سفیر نے کہا کہ مشرق وسطیٰ جنگ کے دہانے پر پہنچ گیا ہے۔