“جینت چودھری بی جے پی میں جارہے ہیں” آرایل ڈی کا انکار مگر نیوز چینلوں کا اصرار

لکھنؤ۔ (آرکے بیورو) انڈیا الائنس کے خلاف دائیں بازو کے میڈیا کا پروپیگنڈہ لگاتار جاری ہے نیوز چینلوں کا بڑا سیکشن اس کے ٹوٹنے بکھرنے کی خبریں پھیلانے میں مسلسل مصروف ہے ممتا کی کانگریس سے ناراضگی کا انکشاف کرنے کے بعداس نے دعویٰ کیا ہے کہ یوپی میں بھی حالات اچھے نہیں ہیں جینت چودھری بی جے پی کی گود میں جارہے ہیں
نیوز چینلوں کے مطابق بہار کے بعد اب اتر پردیش میں بھی انڈیا اتحاد ٹوٹنے کے دہانے پر ہے۔ خبر ہے کہ آر ایل ڈی اور سماج وادی پارٹی کے درمیان اتحاد ٹوٹ سکتا ہے۔ ذرائع سے بتایا جا رہا ہے کہ آر ایل ڈی ممبران اسمبلی کو دہلی بلایا گیا ہے۔ اترپردیش اسمبلی اجلاس کے اختتام کے بعد، آر ایل ڈی ایم ایل اے دہلی جائیں گے جہاں آر ایل ڈی کے سربراہ جینت چودھری ان سے اتحاد کے بارے میں بات کریں گے۔
ذرائع کے مطابق آر ایل ڈی نے بی جے پی سے کیرانہ، متھرا، باغپت، امروہہ اور مظفر نگر سیٹوں کا مطالبہ کیا ہے۔ متھرا اور مظفر نگر سیٹوں پر بی جے پی اور آر ایل ڈی کے درمیان مسائل کے حل ہوتے ہی اتحاد کا باضابطہ اعلان بھی کیا جا سکتا ہے۔ تاہم، بی جے پی آر ایل ڈی کو تین سیٹیں دینے کے لیے تیار ہے۔ بی جے پی کیرانہ، باغپت اور امروہہ آر ایل ڈی کو دینے کے لیے تیار ہے۔ اس کے علاوہ آر ایل ڈی کو کارپوریشن بورڈ، کمیشن اور کابینہ میں شامل کیا جاسکتا ہے۔ کہا جا رہا ہے کہ مظفر نگر، کیرانہ اور بجنور سیٹوں پر آر ایل ڈی کا ایس پی کے ساتھ تنازعہ تھا۔ ایس پی کیرانہ، مظفر نگر اور باغپت میں آر ایل ڈی کے نشان پر اپنے امیدوار کھڑے کرنے کی بات کر رہی تھی۔ اسی معاملے پر دونوں کے درمیان بات چیت ہوئی۔ قابل ذکر ہے کہ سماج وادی پارٹی نے کہا ہے کہ وہ آر ایل ڈی کو 7 سیٹیں دے گی۔ تاہم وہ کون سی سیٹیں ہیں اس پر سسپنس برقرار ہے۔ اس معاملے کو لے کر آر ایل ڈی میں بھی ناراضگی تھی۔ تاہم، بی جے پی کے ساتھ اتحاد کو لے کر آر ایل ڈی کی طرف سے بھی انکار کیا گیا ہے۔ آر ایل ڈی کے قومی ترجمان روہت جاکھڑ نے ایک ویڈیو پیغام جاری کرتے ہوئے کہا کہ بی جے پی کے ساتھ اتحاد کی بات افواہ ہے۔ انہوں نے کہا کہ آر ایل ڈی بی جے پی کے خلاف لڑتی رہی ہے اور لڑتی رہے گی۔ آر ایل ڈی ان سیٹوں پر اتحاد کی جانب سے الیکشن لڑے گی جن کا انڈیا الائنس کے تحت فیصلہ کیا گیا ہے۔