لکھنؤ :(ایجنسی)
اتر پردیش میں چوتھے مرحلے کے انتخابات کے لیے کانگریس نے اپنی ایڑی چوٹی کا زور لگا دیا ہے۔ اس مرحلے میں کانگریس جنرل سکریٹری پرینکا گاندھی نے لکھنؤ کے چنہٹ میں روڈ شو کے ذریعے گھر گھر عوامی رابطہ کیا۔ اس دوران پرینکا گاندھی کے روڈ شو کو عوام کی جانب سے زبردست پذیرائی ملی۔
جیسے ہی پرینکا گاندھی کا قافلہ چنہٹ کے علاقے سے سڑکوں پر نکلا تو ہزاروں لوگ انہیں دیکھنے کے لیے جمع ہو گئے۔ ہجوم نے پرجوش انداز میں ان کا استقبال کیا اور ان کی حوصلہ افزائی کی۔ کئی نوجوانوں کو ٹی شرٹ پہنے دیکھا گیا جس پر پرینکا گاندھی کی تصویر چھپی ہوئی تھی۔ آپ کو بتا دیں، پرینکا گاندھی نے لکھنؤ کی بخشی کا تالاب اسمبلی سیٹ سے کانگریس امیدوار للن کمار کے لیے ووٹ مانگے۔
